OQO-da 5 jylda 47 myń otbasy baspanamen qamtylady

Bıyldan bastap Ońtústik Qazaqstanda qurylys kóleminiń ósimi 10 paıyzdan  asyp,  2021 jylǵa deıin  jylyna 1 mıllıon sharshy metrden astam turǵyn úı paıdalanýǵa berilip otyrady. Bul týraly aımaqtyq kommýnıkasııalar ortalyǵynda ótken baspasóz máslıhatynda  oblys ákiminiń birinshi orynbasary Darhan Satybaldy málim etti, dep habarlady OQO ákimdiginiń baspasóz qyzmeti. Memlekettik  «Nurly jer» turǵyn úı qurylysy baǵdarlamasynyń óńirdegi iske asyrylý barysyn baıandaǵan  Darhan Amangeldiuly  negizgi bes baǵytqa toqtaldy. «Turǵyn úı qurylysynyń damý josparyna sáıkes, óńirimizde  5 jylda barlyq qarjylandyrý kózderi arqyly jalpy 47 619 otbasyny baspanamen qamtamasyz etetin bolamyz»,  - dedi Darhan Amangeldiuly. Birinshi baǵyt - ıpotekalyq nesıe berýdiń qoljetimdiligin arttyrý. Munda halyq tarapynan suranysty yntalandyrý maqsatynda, ekinshi deńgeıdegi bankterdiń ıpotekalyq nesıe berý kólemin arttyrý úshin, jyl saıyn respýblıka boıynsha 10 mlrd. teńge sýbsıdııa beriledi. Iаǵnı, qazirgi tańda bankter arqyly beriletin ıpotekalyq nesıe kólemi jyldyq 17 paıyzdy qurasa, baǵdarlama sheńberinde  onyń 7 paıyzy  sýbsıdııa bólý arqyly jabylatyn bolady. Al, túpkilikti qaryz alyshýǵa 10 paıyzben, turǵyn úıdi satyp alýǵa nesıe 15 jylǵa deıin berilmek.  Nesıe kólemi - 15 mln. teńge. Negizgi talaptyń biri - qaryz alýshynyń shotynda satyp alynatyn turǵyn úıdiń 30 paıyz mólsherinde qarajaty jınalýy tıis. Baǵdarlama shegindegi ıpotekalyq nesıe alý, turǵyndarǵa aı saıynǵy tólemin 30 paıyzǵa tómendetilmek.  Bul shara óz tarapynan, ıpotekalyq nesıeni qoljetimdi etip, turǵyndardyń baspana alýyna úlken múmkindikter týǵyzbaq. «Baǵdarlamanyń kelesi baǵyty - jeke qurylys salýshylardy yntalandyrý. Jeke qurylys salýshylardy yntalandyrý maqsatynda ekinshi deńgeıdegi bankterge  nesıe berý kólemderin keńeıtý arqyly qurylys kompanııalaryn qarjy resýrstarymen qamtamasyz etý kózdelip otyr. Bul maqsatqa jyl saıyn respýblıkalyq bıýdjetten 11 mlrd.teńge sýbsıdııa bólinbek. Sýbsıdııa 3 jylǵa berilip,  turǵyn úı qurylys jınaq banki salymshylaryna daıyn turǵyn úıdiń keminde 50 paıyzy  usynylatyn bolady. Bul óz kezeginde  157 mlrd.teńgeni sýbsıdııalaýǵa múmkindik berip, 600 myń. Sharshy metr turǵyn úı  salýǵa sebep bolmaq» , - dedi oblys ákiminiń birinshi orynbasary. Úshinshi baǵyt-turǵyn úı qurylys jınaqtary júıesi arqyly kredıttik baspana  salý.  Turǵyn úı qurylys jınaq banki salymshylary, onyń ishinde jergilikti atqarýshy organda esepte turǵan kezektegi adamdar úshin qoljetimdi turǵyn úı kólemin arttyrý úshin kredıttik baspana salý jalǵasatyn bolady. Munda nesıelik úı qurylysy 2 baǵyt arqyly iske asyrylmaq.  Birinshiden, merzimdiligi 2 jylǵa deıin bólingen qarajatty qurylystyń jańa jobalaryna qaıta jumsaý arqyly JAO-nyń oblıgasııalar shyǵarýy jolymen júzege asady.  2017-2021 jyldar aralyǵynda respýblıka boıynsha «Báıterek» UBH AQ-nyń oblıgasııalary arqyly 805,7 mlrd.teńge bólý josparlanyp otyr.   Nesıelik turǵyn úıdiń quny 1 sharshy metri –140 myń teńgege deıin bolmaq.  Osylaısha oblys boıynsha 2017-2021 jyldar aralyǵynda shamamen 78,2 mlrd.teńgege nesıelik úıler salynyp, 558,6 myń sharshy metrdi quraıtyn 7146 páter paıdalanýǵa berý josparlanyp otyr. Ekinshiden, bankterge shartty salymdar salý arqyly júzege asady. Turǵyn úı qurylys jınaq banki ekinshi deńgeıli bankterge tómengi paıyzben qarjy berip, ol qarjy turǵyn úı salatyn kompanııalarǵa 7 paıyzben  usynylmaq. Bul shara turǵyn úı salý kólemin edýir arttyrady dep kútilýde. Tórtinshi baǵyt - halyqtyń áleýmettik álsiz toptary úshin jalǵa beriletin  turǵyn úı qurylysy. 2017-2021 jyldar aralyǵynda óńirimizdegi respýblıkalyq bıýdjetten arendalyq turǵyn úıler qurylysyna 159,6 mlrd. teńge qarastyrylǵan. Búgingi kúnge oblysta turǵyn úı kezegine 43 myńnan astam adam tirkelgen. Bul respýblıka boıynsha 3-shi kórsetkish. Atalǵan jyldar aralyǵynda 427,9 myń sharshy metr arendalyq turǵyn úı 6816 páter qurylysyn júrgizý josparlanýda. Baǵdarlamadaǵy besinshi baǵyty - jeke turǵyn úı qurylysyn damytý. Bul baǵyttyń sheńberinde kóptegen ozyq álemdik  qalalardyń úlgisinde biryńǵaı sáýlettik stılde jeke turǵyn úıler salýǵa basymdyq beriledi. Sondaı-aq 2018 jyly oblysta 2 pılottyq jobany júzege asyrý kózdelýde. Onyń birinshisi, Shymkent qalasynyń «Bozaryq» móltek aýdanynda iske asady.   «Bozaryq» turǵyn úı kesheni ınvestısııalyq jobasy boıynsha 74 ga  jer telimine 293 jeke turǵyn úı salý kózdelýde. Al ekinshisi, Shymkent qalasynyń «Tasken» turǵyn alabynda júzege asady.  Jospar  boıynsha jalpy aýdany 180 ga jerge 1050 jeke turǵyn úı boı kóteredi.