Boksshy Álı Ahmedovtiń jekpe-jegi sáýir aıynda ótetin boldy

Qazaqstandyq kásipqoı boksshy Álı Ahmedov altynshy jekpe-jeginde gambııalyq Patrık Mendımen judyryqtasatyn boldy. Qos sportshynyń arasyndaǵy aıqas 11 naýryz kúni Ulybrıtanııanyń London qalasynda ótýi tıis bolatyn. «Londonda 11 naýryz kúni jekpe-jegim ótýi tıis bolatyn. Biraq uımdastyrýshylar úlken boks keshin ótkizbek bolyp otyr eken. Al men kezekti jekpe-jegimdi Polshanyń Varshava qalasynda sharshy alańǵa gambııalyq Patrık Mendıge qarsy ótkizemin. Aıqas segiz raýndqa sozylady. Qarsylasym álemdik reıtıngtegi úzdik 50 boksshynyń biri», – dedi qazaqstandyq boksshy. «Buǵan deıingi urystaryn kórip shyqtym. Tájirıbeli boksshy. Kóptegen tıtýldy jekpe-jekter ótkizgen. Reseılik Dmıtrıı Chýdınovpen teń túsken. Brıtanııalyq Kallým Smıtpen, fransııalyq Hassan N'Jıkammen kúsh synasqan. Ońaı qarsylas emes», – dedi jartylaı aýyr salmaqtaǵy boksshy. Aıta keteıik, 21 jastaǵy bylǵary qolǵap sheberi kásipqoı boksta bes ret sharshy alańǵa shyǵyp, bárinde jeńispen (tórt nokaýt) aıaqtaǵan. Sońǵy ret ol belorýs boksshysy Vladımır Harkevıchten upaı sanymen basym tústi. Aıqastan keıin Ahmedov jaraqat alǵan qolymen judyryqtasqany belgili boldy.