QHA eldegi dinaralyq kelisimdi konstıtýsııamen qorǵaýdy usyndy

QHA atynan Parlament Májilisiniń depýtaty Natalıa Jumadildaeva elimizde dinaralyq kelisim boıynsha konstıtýsııalyq qorǵaýdy bekitýdi usyndy, dep habarlaıdy QazAqparat. «Ultaralyq jáne konfessııaaralyq kelisimdi saqtaý men damytý Ata zańnyń negizgi ustanymdarynyń biri bolýy tıis dep sanaımyz. Sondyqtan da áriptesim Roman Kımniń konstıtýsııalyq qorǵaý kepilimen tek ultaralyq qana emes, sonymen qatar konfessııaaralyq kelisimdi de qamtý týraly usynysymen kelisemin», - dedi ol Parlament palatalarynyń birlesken otyrysynda. Osyǵan baılanysty Qazaqstan halqy Assambleıasy atynan saılanǵan depýtattar QR Konstıtýsııasynyń 39-baby 2-tarmaǵyna «ultaralyq qana emes, sonymen qatar konfessııaaralyq kelisimdi buzýǵa qabiletti kez kelgen is-qımyldardy konstıtýsııalyq emes dep taný» usynysyn kóterdi. «Konstıtýsııaǵa ózgerister engizý týraly zań jobasy jalpyǵa ortaq talqylaýdan ótip, halyq tarapynan qoldaýǵa ıe boldy. О́ńirlerge saparlar barysynda Prezıdenttiń konstıtýsııalyq reformasyn qazaqstandyqtar qoldaıtynyna kóz jetkizdik. Sondyqtan da biz bul zań jobasyn tolyqtaı qoldaımyz»,-dedi ol. Aıta keteıik, palatalardyń birlesken otyrysy barysynda «Qazaqstan Respýblıkasy Konstıtýsııasyna ózgerister men tolyqtyrýlar engizý týraly» QR Zańynyń jobasy birinshi oqylymda talqylandy. Qos palata otyrysynda Elbasy Nursultan Nazarbaev konstıtýsııalyq reformalardy eskere otyryp, Úkimet pen Parlament qandaı jaǵdaıda jumys isteıtindigin túsindirgen bolatyn.