6 naýryzda Parlament palatalarynyń birlesken otyrysy ótedi

6 naýryzda Parlament palatalarynyń birlesken otyrysy ótip, onda «Qazaqstan Respýblıkasynyń Konstıtýsııasyna ózgerister men tolyqtyrýlar engizý týraly» QR Zańynyń jobasy ekinshi oqylymda qaralady, dep habarlaıdy QazAqparat. Mundaı usynysty búgin Parlament palatalarynyń birlesken otyrysynda joǵary zań shyǵarýshy organ palatalarynyń birlesken komıssııasynyń tóraǵasy Nurlan Ábdirov jasady. «Birinshiden, 4 naýryzda  Parlament  palatalarynyń barlyq turaqty komıtetteri ózderiniń otyrystaryn ótkizýi tıis bolady. Onda búgin depýtattar tarabynan zań jobasyna qatysty aıtylǵan  usynystar men eskertýlerdi talqylap, birlesken komıssııaǵa ózderiniń qorytyndysyn engizedi. Ekinshiden, erteń  saıası partııalardyń fraksııalarynda zań jobasyn talqylaýdy usynamyn. Úshinshiden, komıtetterdiń qorytyndylaryn, saıası partııalar fraksııalarynyń sheshimderin, depýtattardyń usynystaryn 5 naýryz kúni saǵat 14.00-ge deıin birlesken komıssııaǵa jazbasha túrde  berýdi usynamyn», - dedi  birlesken komıssııa tóraǵasy. Onyń atap ótýinshe, birlesken komıssııa Parlament palatalarynyń birlesken otyrysyna  zań jobasyna qatysty salystyrmaly keste ázirleıtin bolady. «Osyǵan baılanysty osy jyldyń 6 naýryzy kúni Parlament palatalarynyń birlesken otyrysy aıasynda zań jobasyn ekinshi oqylymǵa shyǵarýdy usynamyn»,-  dedi Ábdirov. Osy rette Májilis tóraǵasy Nurlan Nyǵmatýlın bul zań jobasy  ekinshi oqylymǵa deıin Májilis pen Senattyń turaqty komıtetterinde, saıası partııalardyń fraksııalarynda talqylanyp,  barlyq usynystar birlesken komıssııaǵa beriletindigin atap ótti. «Komıssııa olardy jan-jaqty talqylap, tıisti  qujattar ázirleıdi. Sodan keıin Parlament palatalarynyń birlesken otyrysynda  qaraıtyn  bolamyz. Osyǵan baılanysty jańa ǵana komıssııa tóraǵasy 6 naýryz  kúni saǵat 10-da zań jobasyn ekinshi oqylymda qaraý týraly usynys jasady»,-  dedi Nyǵmatýlın.