Aýyl sharýashylyǵy mınıstrliginiń keńeıtilgen otyrysy ótti

Búgin Qazaqstan Respýblıkasy Premer-mınıstriniń orynbasary – Aýyl sharýashylyǵy mınıstri Asqar Myrzahmetovtiń tóraǵalyǵymen Aýyl sharýashylyǵy mınıstrligi alqasynyń keńeıtilgen otyrysy bolyp ótti. Onda Elbasynyń Joldaýda aıtqan tapsyrmalaryn júzege asyrý joldarymen AО́K-ti damytýdyń 2017-2021 jyldarǵa arnalǵan memlekettik baǵdarlamasy talqylandy, dep habarlady Aýyl sharýashylyǵy mınıstrliginiń baspasóz qyzmeti. Elbasy jańa Joldaýynda agroónerkásiptik keshendi bolashaǵy zor salalardyń biri retinde kezekti ret atap kórsetti. Mınıstrliktiń aldynda AО́K-ti Qazaqstan ekonomıkasynyń jańa draıverine aınaldyrý jóninde naqty mindetter qoıylyp otyr. Búginde Qazaqstannyń álemdik azyq-túlik naryǵynda óz ornyn alýy jáne eń aldymen, ekologııalyq taza taǵam ónimi arqyly birinshi oryndy ıelenýi elimizdiń basty maqsaty bolyp sanalady. Alǵa qoıǵan maqsattarǵa tolyǵymen qol jetkizý úshin Elbasymyz bıyl 14 aqpanda AО́K-ti damytýda jańa Memlekettik baǵdarlamany bekitti. Baǵdarlamanyń basty artyqshylyqtary: ishki naryqty arttyrý jáne otandyq ónimniń eksporttyq áleýetin damytý, aýylsharýashylyq kooperasııasyna shaǵyn jáne orta sharýashylyqtardy tartý, sý resýrstaryn tıimdi paıdalaný jáne saýda-logıstıkalyq ınfraqurylymdy damytý bolyp esepteledi. Memlekettik baǵdarlamanyń tapsyrmalaryn oryndaý jáne jaqsy kórsetkishterge qol jetkizý maqsatynda 28 aqpandaǵy Úkimet otyrysynda maquldanǵan kelesideı is-sharalar jospary jasaldy. Baǵdarlamany júzege asyrýdaǵy negizgi tásildiń biri – shaǵyn jáne orta sharýashylyqtardy aýylsharýashylyq kooperasııasyna tartý. Elbasynyń tapsyrmasymen ótken jyldan beri atalǵan joba iske asyryla bastaǵan bolatyn. 15 myń jeke qosalqy sharýashylyqty qamtyǵan 157 kooperatıv quryldy. Olardyń bazasynda júzden asa sút qabyldaıtyn pýnkt jáne jeti myń otbasylyq mal jemdeý oryndary uıymdastyryldy. 2017 jyly ákimdikter 410 kooperatıv qurý týraly josparlaýda (Memlekettik baǵdarlama aıasynda 326 AShK). Ishki naryqty toltyrý men otandyq ónimniń eksporttyq áleýetin damytý jáne memlekettik kómektiń qarjylyq sharalaryn tıimdi paıdalaný úshin sezimtal taýarlar ımportynyń ornyn almastyrýda naqty ındıkatorlar belgilendi, eksportty ulǵaıtý jáne memlekettik qoldaý sharalary qarastyryldy. Sýbsıdııanyń 11 tıimsiz túrin qoldanystan aldy, sýbsıdııanyń 39 túriniń normatıvine ózgerister engizildi. Nátıjesinde, sol bıýdjet kóleminde memlekettik qoldaý sharalarynyń óndirýshilerdi qamtýy 7,5 esege ulǵaıady (67-den 500 myńǵa deıin) jáne eń aldymen, shaǵyn sharýashylyqtar men kooperatıvter qamtylady. Soǵan qosa, jańa mehanızmder sońǵy nátıjege baǵyttalǵan. Iаǵnı, ónimdilik, salmaq ósimi men óndirýshilik qýatyn tolyqtaı jumys istetý. Sonymen qatar, memlekettik retteýdi sıfrlyq tehnologııalarǵa kóshirý kózdelýde. Naqty toqtalsaq, sýbsıdııalardy avtomattandyrý prosesi engiziledi. Búgingi kúni sýbsıdııalardyń 17 baǵytynyń ekeýi – asyl tuqymdy mal sharýashylyǵy, tyńaıtqyshtar boıynsha ǵana ótinim Elektrondyq úkimet portaly arqyly beriledi. Osy jyly paıyzdyq mólsherleme, tyńaıtqyshtar, gerbısıdter boıynsha tolyq avtomattandyrý iske asyrylady. Kelesi jyly barlyq sýbsıdııalardy berý prosesin avtomattandyrýdy josparlap otyrmyz. Bul ótinimderdi qaraý merzimin ortasha eseppen 2,5 esege – 18 kúnnen 7 kúnge deıin qysqartýǵa múmkindik beredi. Bul shara sýbsıdııa berý kezindegi sybaılas jemqorlyq táýekelderin tómendetedi. 2021 jylǵa deıin azyq-túlik ónimderin eksporttaýdy 40%-ǵa ulǵaıtýdy mindetteıtin naqty tapsyrmalar bar. Osy tapsyrmalardy oryndaý úshin ár jylǵa shaǵylǵan naqty ındıkatorlar belgilengen. Bıyl eksportty 10% ulǵaıtý kózdelip otyr. Sý jáne jer resýrstaryn tıimdi paıdalaný jónindegi tapsyrmalar aıasynda: 41 apattyq jaǵdaıdaǵy sý sharýashylyq júıesin jáne gıdrotehnıkalyq qurylystardy rekonstrýksııalaý, 22 jańa sý qoımasyn salý, jer sýarý ınfraqurylymyn jáne drenajdyq júıe qurylysyn qalpyna keltirý boıynsha sharalar júzege asady. Joǵaryda belgilengen sharalar Elbasynyń 600 myń gektardan asa jerdi turaqty sýlandyra otyryp, 2021 jyly onyń kólemin 2 mln. gektarǵa jetkizý týraly tapsyrmasyn oryndaýǵa múmkindik beredi. Sonymen qatar, Memelekettik baǵdarlama aıasynda, tyńaıtqyshtardy sýbsıdııalaý mehanızmin qarastyrý tyńaıtý kólemin 376 myń tonnaǵa deıin ulǵaıtýǵa múmkindik beredi.