Soltústik Qazaqstanda sý tasqynyn ǵaryshtan baqylaýǵa bolady

Soltústik Qazaqstan oblysynda naýryz aıynyń sońyna taman sý tasqyny bolady dep kútilýde, dep habarlaıdy «QazAqparat». «Qazgıdromettiń» deregi boıynsha, óńirde jyly sıklonnyń yqpalymen aýa temperatýrasy +8 gradýsqa deıin jylynady. Kóktem erte kelip, qar erı bastaıdy. Bıyl jekelegen aýdandarda qar kóp jaýyp, muz qalyńdyǵy normadan eki-úsh esege artqan. «2016 jylǵy sý tasqynyn eskergen jón. Erigen qar eshqaıda aǵyp ketpegen. Oǵan M.Jumabaev aýdany Býlaevo qalasynyń ortalyǵyndaǵy kól dálel bola alady. Ol qazirge deıin tolyp tur. Onyń jan-jaǵynan bóget salyndy. Alaıda, tasqynnyń qaýpi seıilmedi. Erigen qar sýy turǵyn úılerdi shaıyp ketýi múmkin. Sý tasqyny qaýpi bar beldeýde 20 úı ornalasqan», - dedi SQO TJD azamattyq qorǵanys basqarmasynyń basshysy Ashat Erjanov. Osyndaı qıyn jaǵdaı Kamyshlov saıynda oryn alýy múmkin, sebebi Tarankól kóliniń sýy osy saıǵa qaraı aǵady. Ashat Erjanov atap ótkendeı, saıdyń mańaıynda birneshe eldi meken ornalasqan. Kamyshlov saıyndaǵy erigen qar sýlarynan temirjol men respýblıkalyq mańyzy bar «Petropavl-Astana» tasjoly zardap shegýi múmkin. Qutqarýshylar kóktemgi sý tasqynyna daıyn ekendikterin aıtýda. О́tken jyldyń jaz mezgilinen beri kúrdeli ýchaskelerge taldaý jasalyp, sý tasqyny qaýpi bar 95 eldi meken anyqtalǵan. Ol aımaqtarda qajetti ınjenerlik jumystar júrgizildi. Eldi mekenderdegi qarlar shyǵaryldy. Evakýasııalyq komıssııa qurylyp, apta saıyn óńir basshysynyń aldynda aýdan ákimderi jasalǵan jumystar týraly esep berýde. «Sý tasqynynyń daıyndyq jumystaryna jumsalatyn qarjyny jergilikti atqarýshy organdar josparlap qoıdy. Motopompalar satyp alynýda», - dedi Ashat Erjanov. О́ńirdegi barlyq eldi mekenderdegi jaǵdaılar baqylaýǵa alynǵan. Shtabtar, baqylaý qyzmetteri quryldy. Ár aýdanda gıdrometeorologııalyq beketter jumys jasaýda. «Biz sý tasqynynan zardap shegýi múmkin eń qaýipti eldi mekendi anyqtadyq. Bizde spýtnık arqyly óńirimizdiń barlyq aýmaǵyn qadaǵalap otyrýǵa múmkindik beretin ǵaryshtyq baqylaý bar. Sý tasqyny barysynda ǵaryshtyq baqylaýdyń kómegimen qaı aýmaqta sýdyń kóp jınalyp qalǵandyǵyn anyqtap, sáıkesinshe áreket etýge múmkindik bar», - dep atap ótti Ashat Erjanov.