Álemdik saıasattaǵy aıryqsha oqıǵa

2017 jyldyń 3 naý­ryzy tek Qazaq­stan­nyń demokratııalyq damýy­n­daǵy asa mańyzdy be­les qana emes. Biz shyn máninde álemdik saıasattaǵy aı­ryq­sha oqıǵaǵa, tarıhı oqıǵaǵa kýá bolyp otyrmyz. Burynǵy zaman­nan da, búgingi zamannan da abyroıdyń as­qarynda turǵan el basshysynyń óki­lettikteriniń úlken bir bóligin ózi­niń bastama­shyl­dyǵymen memleket­tik bıliktiń basqa tarmaq­taryna óz qolymen úlestirip berýiniń basqa mysalyn taba almaımyz. Jańa memleket qa­lyptastyrý­dyń alǵash­qy belesterinen bas­tap Elbasymyz zańnyń ústemdigin el ómiriniń basty qaǵıdattarynyń biri retinde ornyqtyrǵan edi. Qazirgi konstıtýsııalyq jańǵyrýdy da Prezıdent zańdylyqty tolyq saq­taı otyryp, konstıtýsııa­lyq negizde júzege asyrdy. Aldymen tutas bir aı boıy Konstıtýsııaǵa oılastyrylǵan ózgeris­ter men túzetýler búkil halyqtyń talqylaýyna salyndy, barlyq pikirler eskerilip, eksheldi. Sóıtip, baryp Negizgi Zańǵa engiziletin ózgerister joǵary zań shyǵarýshy organnyń qolymen atqarylatyn boldy. Prezıdent Nursultan Nazarbaev Parlament palatalarynyń bir­lesken otyrysynda sóılegen sózinde qazaqtyń «Keńesip pishken ton kelte bolmas» degen maqalyn kel­tirdi. Rasynda da, bir aılyq búkil­halyqtyq talqylaý barysynda ótken on myńǵa jýyq is-sharaǵa eki mıllıonnan astam adam qatysqany, Ata Zańymyzdaǵy ózgeristerge baılanysty óz pikirlerin ortaǵa sal­ǵany kóp jaıdy ańǵartady. Elbasy­myz qoǵamdyq rezonans týǵyzǵan keı­bir baptar jóninde halyqtyń jumyl­ǵan tuǵyrnamasyn qalyptastyrý arqyly qandaı túıindi de tarqata alatyn danalyǵyn taǵy tamasha tanytyp otyr. Mundaı mańyzdy qadamnyń elimiz úshin taǵdyrsheshti mańyzy bar. Bul bizdiń eldigimizdiń eseıýi­niń kelisti kórinisi. Jıyrma bes jyl­dyń ishinde qalyptasqan qoǵam­­dyq qatynastar memlekettik bılik­tiń joǵary organdarynyń bedeli bıiktegenin, olardyń kemeline kele bastaǵanyn kórsetedi. Jańa jaǵdaı naq konstıtýsııalyq reformanyń qajettigine, ózgeristerdiń pisip-jetilgenine kóz jetkizdi. Osy arqyly Prezıdent Nursultan Nazarbaev óz halqynyń danalyǵyna senetinin dáleldep otyr. Endi biz sol senimge saı bolýdy qamdaýymyz kerek. Saýytbek ABDRAHMANOV, Parlament Májilisiniń depýtaty