О́z elimniń ystyq yqylasyna eshteńe jetpeıdi

Jasyratyny joq, balet, opera sııaqty bekzat ónerdi aımaqtaǵy aǵaıyndar túsinbeıdi dep oılaımyz. Túsinbegen soń kim kóredi, kim tyńdaıdy, kim keledi degen oıdyń da qylań beretini ras. Mine, osy qasań túsinikti sońǵy eki aptadan beri aımaqtarǵa gastroldik saparmen shyǵyp, óner kórsetip júrgen «Astana balet» teatry joqqa shyǵarǵandaı. Bul óner sha­ńyraǵy Aqtóbe, Qostanaı jáne Kókshetaý qalalarynda «Astana Balet GALA» baǵdarlamasy boıyn­sha konsertter qoıyp, jurttyń ys­tyq yqylasyna ıe boldy. Balet ónerin kórýge kelgen jurttyń qarasy kóp bolǵandyqtan, barlyq konsertterde kórermen zalyna qosymsha oryndyqtar qoıýǵa týra keldi. Bul konserttik baǵdarlamaǵa tanymal horeografııalyq mınıatıýralar men bir aktili baletterdiń úzindileri engen. Taǵy bir aıtary, baǵdarlamanyń sapasy men tehnıkalyq bezendirilýi dál elordalyq sahnadaǵydaı jasaldy. Birinshi bólimde ulttyq taqyryp aıasyndaǵy horeografııalyq mınıatıýralar men balet úzindileri kórsetildi. Árbir nómirde ha­lyq­tyń mýzykalyq saryndary men estetıkasy ańǵarylyp, ulttyq naqyshqa toly bolýy teatr repertýaryndaǵy bıdiń dástúrli tásilderiniń saqtalyp, ulttyq horeografııaǵa jańa tynys bitkenin baıqatqandaı. Ekinshi bólimde kórermender belgııalyq horeograf Rıkardo Amoranteniń «GAIA» baletin tamashalady. Osy tusta áıgili balet synshysy Djessıka Tıg «DanceEurope» jýrnalyna jazǵan maqalasynda «Astana Balet» teatrynyń repertýary jaıly aıta kelip, onyń Qazaqstannyń klassıkalyq balet dástúrlerine ıek arta otyryp, Shyǵys pen Ba­tystyń úılesimi degen baǵa bergen bolatyn. Astanalyq balet ujymy buǵan deıin Máskeý, Sankt-Peterbýrg, Beıjiń, Shanhaı, Parıj, Vena, Tokıo, Seýl, Nıý-Iork, Býdapesht, Varshava jáne Baký sahnalarynda óner kórsetip, kórermender zor qurmet kórsetken edi. – «Astana Balet» teatry qazaq­tyń oryn­daýshylyq óne­riniń dástúrin saqtap, ónerge, onyń ishinde, horeografııaǵa degen qyzyǵýshylyqty arttyrýǵa kúsh salady, – deıdi bizben áńgimesinde teatrdyń bas balet­meıstri, Qazaqstannyń eńbek sińir­gen qaıratkeri Aıgúl Tatı. – Aq­tóbe, Qostanaı men Kókshetaýǵa gastroldik sapar kezinde kórer­men qaýymǵa álemdik balet tendensııalary men trendterin pash etip, zamanaýı qazaqstandyq ho­reo­­grafııa ónerin kórsetti. Kó­rer­men qaýym bı óneriniń ásemdigi men saltanatyna kýá bolady. – Bizde úlken-kishi sahna degen uǵym joq, – deıdi balet ánshisi Dıana Batyrova. – Qan­daı sahnada óner kórsetsek te, bar kúsh-jigerimizdi salamyz. Bizdiń basty synshymyz – óz kórermenimiz. Sheteldiń kóptegen qalalarynda óner kórsettik. Degenmen, týǵan elimniń ystyq yqylasyna eshteńe jetpeıdi. Oralhan DÁÝIT, «Egemen Qazaqstan» ASTANA