Eýrazııa tehnologııalyq ýnıversıteti janynda «Start-Up Akademııasy» ashyldy

Almatyda Eýrazııa tehnologııalyq ýnıversıteti janynan «Start-Up Akademııasy» ashyldy, dep habarlaıdy Qazaqstannyń «Damý» qorynyń baspasóz qyzmeti. «Damý» qory men Eýrazııa tehnologııalyq ýnıversıteti (ETÝ) arasynda ózara áriptestik pen túsinistik týraly memorandýmǵa qol qoıyldy. Akademııanyń ashylý saltanatyna Azııa damý banki, Eýropa qaıta qurý jáne damý banki, Dúnıejúzilik bank, Almaty qalasyn damytý ortalyǵy, QR qarjygerler qaýymdastyǵy, MOST bıznes ınkýbatory, «Alataý» ATP, jáne ekinshi deńgeıli bank ókilderi qatysty. «Bul - «Damý» qorynyń seriktes joǵary oqý orny janynda ashqan tórtinshi «Start-Up Akademııasy». Buǵan deıin Pavlodar, Atyraý men Astanada da ashylǵan edi. Akademııa isin jańa bastaǵan kásipkerlerge bıznes-ıdeıadan bastap naryqqa shyqqanǵa deıingi jolda keshendi tegin qoldaý kórsetýge múmkindik beredi. Iаǵnı, konsaltıngtik, aqparattyq qoldaý ǵana emes, ınvestor tartý, qordyń qarjylyq baǵdarlamalaryna qatysýǵa nemese memlekettik grantar alýǵa ótinish berýge de qol ushyn sozamyz»,- dedi «Damý» qorynyń basqarma tóraǵasy Abaı Sarqulov. Ol Almaty qalasyn aımaqtyq startap-hab retinde qarastyrýǵa bolatynyn aıta kelip, qalany Qazaqstanda ınnovasııalyq jańalyqtar ashýǵa múmkindigi mol megapolıs ekenin atap ótti. «Damý» qorynyń qoldaýymen ETÝ janynda «Catapult» atty Start-Up Akademııa qurý kásipkerlerdiń jańa legin daıarlaýǵa jáne otandyq jańa tehnologııalyq startap jobalardy damytýǵa jasalǵan jańa qadam. Akademııa AQSh úkimeti úshin daıarlanǵan kommersııalızasııa baǵdarlamasynyń avtory Tomas Selýchchıdiń ádistemesi boıynsha jańa startaptardy izdep, tańdap, damytýmen maqsatty túrde aınalysatyn bolady. Start-Up Akademııa Almaty qalasynda smart-tehnologııalar men ınnovasııalardyń jasalýyna jáne kásipkerlik ortanyń qalyptasýyna óz úlesin qosatyn bolady», - dedi Eýrazııa tehnologııalyq ýnıversıteniń rektory Nurjamal Dúısenqulova. Shara barysynda «Damý» qory men «Bolashaq» qaýymdastyǵy arasynda áriptestik kelisimge qol qoıyldy. Bul qujat boıynsha qaýymdastyqtyń bilim berý, zııatkerlik, bıznes sekildi kóptegen baǵyttardaǵy áleýmettik mańyzdy jobalaryn birlesip qoldaý qarastyrylǵan. Astana, Pavlodar, Atyraý qalalaryndaǵy Start-Up Akademııalarda 2016 jyldyń qyrkúıek pen jeltoqsany aralyǵynda 102 adam oqyp, 17 joba akselerasııaǵa (bıznes-ıdeıa tabýdan bastap júzege asyrylýyna deıingi súıemeldeý) jetken. Olardyń ishinde 4 joba ınvestısııa aldy.