Qazaqstan astyǵynyń birinshi partııasy Vetnamǵa jetti

Búgin Astana ýaqyty boıynsha saǵat 08:00-de 32 konteınermen kólemi 720 tonna bolatyn qazaqstandyq astyqtyń birinshi partııasy shyǵysqytaılyq Lıanıýngan portynan Vetnamnyń Hoshımın portyna keldi, dep habarlady QazAqparat. VICT termınalynda saltanatty túrde júkti qarsy alý rásiminde Qazaqstannyń Vetnamdaǵy Tótenshe jáne ókiletti elshisi Beketjan Jumahanov, VICT First logistics development (JV) Co. bas dırektory Glen Kýn Vaı Keon, «Lıanıýngan qalasynyń qytaılyq-qazaqstandyq halyqaralyq logıstıkalyq kompanııasynyń» bas dırektory Lıý Bın, vetnamdyq astyq satyp alatyn kompanııa ókilderi, jergilikti telearnalar tilshileri, QHR-da akkredıttelgen qazaqstandyq jýrnalıster qatysty. «Bul Vetnam men EAEO arasyndaǵy erkin saýda aımaǵy týraly qol qoıylǵan kelisim aıasynda qytaılyq Lıanıýngan porty arqyly «QTJ» UK» kompanııasynyń enshiles kásiporny «KTZ Express» AQ-nyń Vetnamǵa qazaqstandyq ónimdi alǵashqy ret jetkizýi. Negizgi mindet - júkti Vetnamǵa jetkizý ǵana emes, Qytaı aýmaǵy arqyly Ońtústik-Shyǵys Azııaǵa taýarlardy jetkizýdiń logıstıkalyq marshrýtyn testiden ótkizý. Biz naryqqa tek astyq qana emes, azyq-túlik ónimderiniń basqa da túrlerin jetkizýge ázirmiz», - dedi Beketjan Jumahanov. Onyń aıtýynsha, Qazaqstan óz ónimin eksporttap qana qoımaıdy, sonymen birge EAEO-ǵa múshe basqa da memleketterdiń taýarlaryn «Qazaqstan - Lıanıýngan (QHR) porty - Vetnam» kóliktik dálizi arqyly Vetnamǵa jáne Ońtústik-Shyǵys Azııa elderine jetkizedi. «О́ńir halqy 600 mıllıonǵa jýyq. Sondyqtan qazaqstandyq bıznes úshin jaqsy perspektıvalar ashylýda», - dep túıindedi sózin dıplomat.