Dúnıejúzilik boks serııasy: Mijıtov qytaılyq boksshyny eki ret nokdaýnǵa jiberdi

Atyraýda ótip jatqan Dúnıejúzilik boks serııasynda (WSB) qazaqstandyq «Astana Arlans» pen qytaılyq «China Dragons» komandalary qolǵap túıistirdi. Úshinshi bolyp rıngke 64 kıloda Dilmurat Mijıtov pen Iаn Lo shyqty. Birinshi raýndta qos boksshy bir-birin ańdysýmen boldy. Ashyq túrde aıqasqa shyǵa qoımady. Ekeýi de soqqylaryn ótkize bildi. Biraq tóreshiler Dilmurattyń ónerin joǵary baǵalap, alǵa shyǵardy. Kelesi kezeńde otandasymyzdyń ásirese, djeb soqqylary dál tıip jatty. Qorǵanysta saq qımyldaǵanmen, azdap senimdilik jetispeıtindeı kórindi. Aıaǵy taıyp jyǵylǵan kezi de boldy. Úshinshi raýndta Mijıtov sharshy alańdy tolyǵymen bılep aldy deýge bolady. Rıng jaǵasyna taqap alyp, tómpeshtep alǵan sátteri de boldy. Eki qolymen baǵyttaǵan soqqylary dóp tıip jatty. Bastapqy úsh raýndtyń qorytyndysy boıynsha alda keldi. Tórtinshi raýnd ta Dilmurattyń enshisinde boldy. Birneshe soqqysynan keıin Iаn Lo tipti nokdaýn alyp qaldy. Otandasymyzdyń joıqyn soqqylarynan keıin qytaılyq boksshy denesin áreń kóterip, ornynan turǵan. Qarqynyn údetken sportshymyz qytaılyqty ekinshi ret nokdaýnǵa jiberdi. Úziliste es jıǵan Iаn Lo sońǵy úsh mınýtty shıraq bastady. Biraq otandasymyz onyń soqqylarynan sytylyp shyǵyp, qarsy soqqylarymen aıbaryn taǵy da bir márte kórsete tústi. Qorytyndysynda Dilmurat Mijıtov ózi ǵana jeńiske jetip qoımaı, «Astana Arlandarynyń» ýaqytynan burynǵy jeńisine de sebepshi boldy.