Dúnıejúzilik boks serııasy: Anton Pınchýk jeńispen aıaqtady

Atyraýda ótip jatqan Dúnıejúzilik boks serııasynda (WSB) qazaqstandyq «Astana Arlans» pen qytaılyq «China Dragons» komandalary qolǵap túıistirdi. Sońǵy bolyp sharshy alańǵa aýyr salmaqta (91 kg) Anton Pınchýk pen Qytaı ujymynyń atynan Sergeı Novıkov shyqty. Birinshi raýndtyń basynda qos boksshy bir-birin ańdysýymen júrip, aıtarlyqtaı shabýylǵa shyǵa qoımaǵan. Biraq bastapqy úsh mınýttyń sońyna taman Anton Pınchýk alǵa umtylyp, birneshe soqqysyn dál tıgize bildi. Ekinshi raýndta Sergeı Novıkov aıtarlyqtaı eshnárse isteı almady. Boıy men qolynyń uzyndyǵyn tıimdi paıdalana bilmedi. Qaıta otandasymyz Anton Pınchýk buryshqa taqap alyp, soqqylaýmen boldy. Kelesi raýndta dál osy baǵytta órbidi. Otandasymyz djeb soqqylaryn dál tıgizip jatty. Novıkovtyń qarsy soqqylarynan jyldam qımylymen shyǵyp ketip júrdi. Tórtinshi raýndta Anton sát saıyn alǵa umtylyp, Sergeıdi buryshqa tyqsyryp júrdi. Ulty belorýs sportshysyna esh múmkindik bere qoımady. Sońǵy úsh mınýtta otandasymyz saq qımyldap, qarsylasynyń shabýylyna qarsy umtylýdy maqsat etip júrdi. Degenmen, qarsylasynyń birneshe soqqysyn ótkizip alǵan sátter de bolyp jatty. Qorytyndysynda Anton Pınchýk boks keshin jeńispen túıindedi.