Parlament róliniń kúsheıgeni – halyq bıliginiń kúsheıgeni

Konstıtýsııaǵa engizýge usynylǵan ózgerister qoǵamdy demokratııalandyrýdy odan ári jalǵastyra otyryp, el eko­nomıkasynyń damýyn jedel­detip, halyqtyń ál-aýqatyn art­tyrýǵa baǵyttalǵan. Jalpy, Prezıdenttiń ózi bastamashy bola otyryp, óz ókilettigin bılik tarmaqtaryna bólip berýi álemdik saıa­satta óte sırek. Endigi jerde Parlamenttiń ókilettigi kúsheıedi, – Úkimetti jasaqtaıdy, onyń qyzmetine baqylaý jasaıdy. Al eger Senat depýtattarynyń basym kópshiligi aımaqtardan saılanatynyn eskersek, Parlamenttiń rólin kúsheıtý arqyly halyq bıligin kúsheıtip otyrmyz dep senimmen aıtýǵa bolady. Taǵy bir ózgeris, 66-baptyń 1-tarmaǵy boıynsha respýblıka Prezıdentiniń kelisimimen memlekettik baǵdarlamalardy endigi jerde Úkimet bekitedi jáne olardyń oryndalýyn qamtamasyz etedi. Úkimet ózi bekitken baǵdarlamalardy qalaı oryndap jatqany týraly Parlament aldynda esep beredi, sóıtip, halyq bıligi Úkimettiń jumysyn baqylap otyratyn bolady. Jýyrda el óńirlerine shyqqan sapar barysynda biz memlekettik bılik tarmaqtarynyń arasynda ókilettikterdi qaıta bólýge qatysty bolatyn kons­tıtýsııalyq reformalardy búkilhalyqtyq talqylaý týraly Memleket basshysynyń bastamasyn halyqtyń oń turǵydan qabyldaǵanyna kýá boldyq. Tek 26-bapqa qatysty alańdaýshylyq bar edi. Elbasy bul bapqa qatysty óte kóregen sheshim qabyldady. Sol sııaqty jergilikti ózin ózi basqarý júıesin damytýdyń bir kórinisi – Prezıdenttiń jergilikti máslıhattardy taratý máselesin Úkimetpen, Parlament palatalary tóraǵalarymen keliskennen keıin sheshýi, aýdan, qala, aýyl ákimderin taǵaıyndaý nemese saılaý­dy tıisti zańdarǵa sáıkes júrgizý týraly ózgerister el arasynda qyzý qoldaý taýyp otyr. Bul oraıda da Parlament palatalarynyń birles­ken otyrysyndaǵy konstıtýsııalyq reforma jónin­degi Jumys tobynyń habarlamasynda keltiril­gen usynystar aımaq turǵyndarynyń aıtqan usynys­tarymen sáıkes keledi. Parlament palatalarynyń birlesken otyrysynda Konstıtýsııaǵa ózgerister engizýge qatysty 6 myńnan astam usynys-tilekter túsýiniń ózi bizdiń halqymyzdyń qoǵamdyq belsendiliginiń joǵary ekendigin baıqatty. Endigi jerde «Bılikti durys paıdalana bilý de óner» dep Elbasy aıtqandaı, Parlament pen Úkimet ózine bólingen bılikti tıimdilikpen paıdalanyp, elimizdiń strategııalyq baǵdarlamalarynan týyndaıtyn mindetterdi oryndaýǵa bar kúsh-jigerdi jumyldyra bilýi asa mańyzdy. Bekmyrza ELAMANOV, Senat depýtaty