Qazaqstanda paıdaly qazbanyń jańa túri óndirile bastady

Jambyl oblysynda gıps jáne gıps ónimderin shyǵaratyn kásiporyn jańa óndiristi iske qosty, dep jazady 24.kz.. Joba aıasynda 4 jańa qurylys materıalyn óndiretin sehtar jumysyn bastady. Endi zaýyttyń ónimdiligin 5 ese kóbeıtýge múmkindik týyp otyr. Jańa óndiristiń qurylysy 2,5 jyl boıy júrgizildi. Qazir bul sehtegi apparattar tolyqtaı iske qosylyp, alǵashqy ónimdi bere bastady. Júıe tolyǵymen avtomattandyrylǵan, sondyqtan, búkil prosessti eki-aq adam basqarady. "Barlyǵyn osy jerden kórip otyramyz. Qaı jerge qansha tonna jiberdik, qansha shyǵyp jatyr, qansha shyǵysy, qansha kirisi bar. Qappen shyǵaramyz, gıpsakarton sehyna jiberemiz, pnevmotransporttyń kómegimen. Qazirgi zaman talabyna saı biz qolmen emes, bári avtomattandyrylǵan", - deıdi zaýyt operatory Esen Tileýqabyl. Al myna sehte mıkrokalsıd untaǵy shyǵarylady. Onyń qoldaný aıasy keń, qurylys salasynan bastap kosmetologııaǵa deıin paıdalanylady. Munda jylyna 56 myń tonna ónim daıyndalady. "Birinshi etapta biz qurylys materıaldaryna qajetti ólshemi 70, 100 mıkrondy kalsıd untaǵyn shyǵarýdamyz. Ekinshi etapta eń kúrdeli sanalatyn 5 mıkronǵa deıin kalsıd untaǵyn shyǵarý josparda. Jáne bul óndiris alańynda shyǵarylyp jatqan ónimder álemidk standarttarǵa saı", - deıdi zaýyt basshysynyń orynbasary Dımar Melsın. Kásiporyndaǵy taǵy bir jańalyq Qazaqstan aýmaǵynda alǵashqy ret perlıt atty materıal óndirile bastady. Ol qurylys pen aýyl sharýashylyǵy salalaryna asa qajet. Jylyna 80 myń tekshe osy taýar túrin shyǵarý josparda. Jalpy, kompanııa bıyldan bastap barlyq ónim túrleriniń kólemin eseleýdi kózdep otyr. Onyń ishinde 170 myń tonna gıps, 100 myń tonna qurǵaq qurylys qospalary óndirilmekshi. "Jambylgıps AQ memlekettik «Bıznesti damytý» baǵdarlamasy aıasynda TMD elderinde gıps óndirýdegi eń iri, qýatty ınnovasııalyq jobany iske qosty. Bul jobanyń iske qosylýy kompanııanyń birinshiden qarjy dárejesi ósedi. Jáne sapaly, arzan ónim shyǵarýǵa, ónimniń ózindik qunyn azaıtýǵa múmkindigimiz bolady. Kompanııa 35 paıyzyn eksportqa shyǵarýǵa daıyn", - deıdi zaýyt basshysy Qaınarbek Qusaıynov. Bul Jambylda jasalǵan mundaı taýar túrleri shet eldik kompanııalarmen básekelestikke túsedi degen sóz. Qazirdiń ózinde Reseı, Qyrǵyzstan, Tájikstan jáne О́zbekstan elderi zaýyttyń jańa ónimderine asa qyzyǵýshylyq tanytyp otyr. Bul jumystardyń barlyǵy zaýytty jańalaý jáne qaıta jańǵyrtý jobasy aıasynda júzege asyp otyr.