Osyndaı oıymyz bar

Aqtoǵaı aýdany, Jolaman aýylyndaǵy mektep «Aqbıdaı negizgi mektebi» dep atalady. Keńes dáýirinde atalmysh aýyl Jdanov atyndaǵy sovhozdyń bólimshesi bolǵan. Bertinirekte, Jdanov ataýyn «Aqbıdaı» dep ózgertken-di. Aty ózgergen sovhozdyń búgingi tańda aty túgili, zaty da joq. Jolaman aýyly – kezinde qara daq jaǵyp, qýǵyn-súrginge ushy­ra­typ, «halyq jaýy» atandyrǵan, ar­tynan abaqtyda atylyp ketken Nur­muhanbet Márdenov esimdi Alash azamatynyń týyp-ósken jeri. Bıyl sol arysymyzdyń týǵanyna 110 jyl tolyp otyr. Biraq jurt tilegi eskerilip ózi oqyǵan, keıin ustazdyq etken mektepke esil er esimi búgingi kúnge deıin berilmeı keledi. Ol 1918-1919 jyldary kór­nekti jazýshy Sábıt Muqanovpen Omby muǵalimder semınarııa­syn­da qatar oqyp, alǵashqy eńbek jolyn Jolaman aýyl mektebinen bastaǵan eken. Alashtyń Maǵjan Jumabaev syndy birtýar ulymen de Nur­muhanbet Már­denov tyǵyz qarym-qatynasta bol­ǵan. Kenje inisine Maǵjan esimin berip, aqynmen dos, pikirles júrgen. Nurmuhanbettiń jalǵyz ba­la­sy – Násken Nurmuhan­betuly Már­denov qazir Almaty qalasyn­da tura­dy. Ol kisi ákesi atylǵan Omby jerinen bir ýys topyraǵyn Jola­manǵa ákelip, ata-baba zı­ratyna qoıyp, urpaqtary már­már tastan eskertkish ornatty. Sóıtip, úlgili iske uıytqy boldy. Jýyrda jaqsydan qalǵan tuıaq Násken Nurmuhanbetuly jerlesteri – bizderge arnap hat jiberipti. Onda qarııa Qazaqstan táýel­sizdiginiń 20 jyldyǵy qarsańyn­da týǵanyna 110 jyl tolǵaly otyr­ǵan azamattyń esimi ózi oqy­ǵan, qyzmet etken mektepke berilse ıgi bolar edi depti. Biz de kópten beri aıty­lyp, sheshimin tappaı kele jatqan osy tilekke qo­sylamyz. Arysy­myz­dy umyt­paı ardaqtasaq, qane! Bul óti­nishke tıisti oryndar mán berip, oń sheshim shyǵarady degen senimmen aýyl turǵyndarynyń atynan: B.Smaǵulov – mektep dı­rek­tory, I.Rahımov – oqý isiniń meń­gerýshisi. Muǵalimder: D.Toqsanbaeva, B.Shúkelova jáne hatqa budan basqa 13 adam qol qoıǵan. Pavlodar oblysy, Aqtoǵaı aýdany, Jolaman aýyly.