«Dala qasqyrlary» jeke-dara kósh bastady

Chempıonatty iri jeńispen bastaǵan «Tobyl» óz alańynda «Aqtóbeni» qabyldady. Stadıon daıyn bolmaǵandyqtan oıyn Qostanaıda emes, Zatobolsk degen qalada ótken edi. Syralǵy qarsylastar arasyndaǵy match alma-kezek shabýylmen órbidi. Alǵashqy mınýttarda alań ıeleriniń shabýylshysy Djordje Despotovıch baspen uryp, qaqpaǵa qaýip tóndirse, qonaqtardyń oıynshysy Igor Zenkovıch alystan teýip, esep asha jazdady. Oıynnyń ekinshi bóliginde chempıonat surmergeni Alekseı Shetkınniń gol soǵatyn eki birdeı múmkindigi bolǵan. Alaıda, shabýylshynyń soqqylary qaqpadan qıys ketip jatty. Oıynnyń sońyna taman qostanaılyqtar qarsylas qaqpany torýylǵa aldy. Biraq, bul oıynda senimdi óner kórsetken qaqpashy Samat Otarbaevty qapy qaldyrýdyń sáti túspedi. Match 0:0 esebimen teń aıaqtaldy. Premer-lıgaǵa qaıta oral­­ǵan «Qaısar» birinshi týr­d­a «Oqjetpesti» iri esep­pen utqan bolatyn. Bul je­ńis qanat­tandyrǵan qyzy­lor­­dalyqtar ekinshi týrda da shabyt­pen oınap, óz alańynda «Ta­razdy» 2:1 esebimen tize búktirdi. Oıynda esepti qonaqtardyń shabýylshysy Rýslan Muha­metshın ashty. Tablodaǵy esepti matchtyń 34-mınýtynda Vladımır Arjanov teńestirdi. Al «Qaısarǵa» jeńis ákelgen ekinshi goldy kezdesýdiń 72-mınýtynda Saıdı Ntıbazonkıza soqty. Osy jeńisten keıin «Dala qas­qyrlary» týrnır kestesinde alty upaımen jeke-dara kósh bastady. Bul týrda «Astana» Pav­lodar baryp, jergilikti «Ertis­pen» kúsh synasty. Oıyn bastalǵannan-aq qonaqtardyń basymdyǵy baıqaldy. Tipti, olar 14-mınýtta esep ashyp, alǵa da shyqty. Dopty alystan teýip «toǵyzdyqqa» týra kirgizgen Serikjan Mýjıkov bolatyn. Bir qyzyǵy, bul gol – «Astananyń» barlyq týrnırlerde soqqan 500-shi goly edi. Kóp uzamaı, alań ıeleri de óz degenderine jetti. Kezdesýdiń 31-mınýtynda Evgenıı Tkachýk qaqpany dál kózdedi. Oıyn sońyna deıin osy esep ózgermeı, match 1:1 esebimen teń aıaqtaldy. Birinshi týrda asa aýyr kezdesý ótkizip, sharshańqyraǵan «Qaırat» Kókshetaýǵa baryp, «Oqjetpespen» oınady. Kez­desýdi eki komanda da asa saq bastaǵan bolatyn. Degenmen, oıynnyń 19-mınýtynda alań ıeleri alǵa shyqty. Lýkas Horvat bergen pas­ty Aleksandr Kozlov golǵa aınaldyra bildi. Soǵylǵan goldyń almatylyqtardy qam­shylaǵany ras. Kóp uzamaı Isaelden tamasha pas alǵan Jarko Markovıch qaqpany dál kózdedi. Ekinshi taımda alańǵa oıynshy almastyryp shyqqan Andreı Arshavın kezdesýdiń kórigin qyzdyrǵan edi. Biraq, reseılik sheber birden gol soǵatyn tamasha múmkindikti jiberip aldy. Matchtyń 53-mı­nýtynda Eldos Ahmetovtiń alańnan qýylǵanyna qaramastan, «Qaırat» alań ıelerin tyqsy­ryp-aq baqty. Kezdesýdiń 82-mı­ný­tynda Andreı Arshavın kózdegen maqsatyna jetti. Biraq, almatylyqtar jeńisti ýysta ustap tura almady. Qosymsha ýa­qytta «Qaırattyń» qaqpasyna bel­gilengen penaltıdi sátti oryn­daǵan Vıtalıı Volkov ko­man­dasyn jeńilisten qutqaryp qaldy. Bul týrda «Ordabasy» men «Atyraý» da teń oınady. Esep – 1:1. «Aqjaıyq» pen «Shahter» arasyndaǵy match soǵylǵan gol­dar­dyń kóptigimen este qaldy. Bul oıynda esep kezdesý bastal­maı jatyp ashyldy: Matıas Rýbıo qaqpa aldyndaǵy qar­balas­ty sheber paıdalana bildi. Ekinshi goldy penaltıdi sátti oryndaǵan Azý Izýka soqty. Kezdesýdiń ekinshi bóligin qaraǵandylyqtar shıraq bastady. Oıynnyń 69-mınýtynda oń qanattan berilgen dopty baspen dál soqqan Dáýrenbek Tájimbetov esep aıyrmashylyǵyn qys­qartty. Alaıda, arada úsh mınýt­taı ótkende taǵy da Azý Izýka mergendik tanytyp, esepti 3:1-ge jetkizdi. Kelesi 3-shi týr 17-18 naýryzda ótedi. «Taraz» ben «Qaırat» jáne «Astana» men «Aqjaıyq» 17 naýryz kúni ózara kúsh synassa, 18-i kúni «Atyraý» – «Ertis», «Aqtóbe» – «Ordabasy», «Oqjet­pes» – «Tobyl» jáne «Shahter» – «Qaısar» matchtary oınalady. Qaırat ÁBILDINOV, «Egemen Qazaqstan»