Fototuzaq Arshaty aýylynyń arǵy jaǵyndaǵy Sarybetke qurylǵan. Barystyń jemi sol mańda bolǵan soń jymy da sol jerde. Ony jergilikti ınspektorlar ábden zerttegen, meńgergen. Taýteke jaılaǵan jalama betkeıdiń bıiginde buǵan deıin de barys birneshe ret sýretke túsken. Bul jolǵysy tańǵalarlyq. Tórt barys dep otyrǵanymyz, úsh kúshigin ertken urǵashy barys eken. Kúshik deımiz, barystyń balasyn qazaq alan desedi. Áleýmettik jelide qarly shyńda syrǵı basyp bara jatqan ilbisterdiń beınesin kórip, dereý Arshaty ormanshylyǵynyń ákki mamany Jomart Amanbaevqa qońyraý soqtyq. 2014 jyldan beri Altaıdyń ala shubar patshasyn baǵyp júrgen Ádiljan Qasymhanov, Manarbek Omarov syndy jigitter.
– Janymda Bolat degen jigit bar. Fototuzaqty tekserýge baryp, beınetaspalardy aınaldyryp kórip otyrmaımyz ba, balpań basyp tórt barys ketip bara jatyr. Qýanǵanymnan shapalaqtap jiberdim. Dál mundaı kadr buryn-sońdy túsirilmegen. Bul úlken qýanysh, tókken terimiz aqtaldy, – deıdi Jomart Amanbaev.
Iá, bir ǵana kadrǵa bola taýdyń ushar basyna jaıaý-jalpy jetedi. Qııa bette taıǵanaqtap júrýdiń ózi qııamet. Aýa qysymy eki ókpeńdi kúıdirse, jalama tastar adymyńdy ashtyrmaıdy. Sol úshin de barys baqqan batyrlardyń eńbegi eren. Sony elestete otyryp, Jomart Amanbaevtan alǵan marapatyńyz bar ma edi desem, gramotam bar deıdi. Shyndyǵynda naǵyz eńbek adamdary osylar. Tabıǵatty qyzǵyshtaı qoryp júrgenderdiń omyraýlaryna qandaı medal taqsa da jarasar edi. Alaıda Amanbaev joldas «jortyp júrgen barysty túsirýdiń ózi maǵan marapat» demesi bar ma? Dese de, Altaıdyń ań-qusyn túgendep júrgen mamandardy marapattap otyrý joǵarǵy jaqtaǵylardyń oıynda júrse eken.
Shyǵys Qazaqstan oblysy,
Katonqaraǵaı aýdany
