Taýyq jyly Arqanyń altyn tabaldyryǵyn súıinshi surap, saýyn aıta saýyqpen attady. Qazynaly Qaraǵandy Ulystyń uly kúnine ortalyq saıabaqta qyryq shatyr tigip, Qydyrdyń salqar kóshin saýmalkólde kútti. Kúni keshege deıin Arqa atyraby Naýryz meıramyn shahardyń basty kósheleriniń biri – Buqar jyraý dańǵylynyń boıyna toılaıtyn. Sonyń saldarynan oblys ortalyǵynda kólik keptelisi týyndap, keleńsizdik demeıik, belgili bir deńgeıde qolaısyzdyq oryn alyp jatatyn.
Ádettegiden bólek, kenshiler astanasyndaǵy bıylǵy merekelik sharalar jańa alańda – ortalyq saıabaqta ótti. Onda úlken sahna ornatylyp, halyqtyń jappaı serýeni de sol aımaqta jóńkildi. Jalpy, Arqa jurtshylyǵy ulyq merekeni ulttyq deńgeıde merekeleýge ábden daǵdylanǵan. Máselen, bıyl qaraǵandylyq talǵampaz turǵyndar kóshpelilerdiń kóne meıramyn qaharly qys pen náýrizek kóktemniń máńgilik tartysyn beıneleıtin mıýzıkl arqyly tamashalady.
Ulystyń uly kúnin merekeleýge oblystyq bıýdjetten, ıaǵnı mádenıet, arhıvter jáne qujattama basqarmasynan 8 mln teńge bólingen. Atalmysh is-sharany uıymdastyrýǵa Almaty men Astanadan arnaıy mamandar shaqyrylyp, kóriniske 600-den astam adam qatysty. Onyń ishinde, mektep oqýshylary men jas ártister, barlyq qaraǵandylyq shyǵarmashylyq ujymdar, teatr ónerpazdary da bar. О́zimizdiń jergilikti ónerpazdar men etno-mədenı ortalyqtardyń ókilderi de bar ónerlerin ortaǵa salyp, toıshyl áleýmettiń kóńilin kúımen, júregin jyrmen jaýlady.
– Dástúr boıynsha Naýryz keńinen toılanady. Teatrlandyrylǵan qoıylym mıýzıkl stılinde ótti. Bul Kóktemniń kelýi men dúnıeniń jaralýy, qazaq eliniń qurylýy týraly ertegi. Sý, aýa, ot – bári qosyldy, – deıdi almatylyq buqaralyq qoıylymdardyń jıyntyq qoıýshy-rejısseri Aspet Jılkına. Bılerdiń horeograf-rejısseri de Almatydan shaqyrylypty. Myń buralǵan bıshilerdi mıýzıklǵa daıyndaǵan Abaı atyndaǵy qazaq ulttyq pedagogıka ýnıversıtetiniń horeografııa kafedrasynyń professory Almat Qurmajanov eken.
Kópshilikke jaýynger-ınternasıonalıster kóshesiniń boıynda jáne kaskadtyq satyda túrli uıymdardyń 33 kıiz úıi, 27 saýda shatyrshalary, jekelegen ústelderi ornatylyp, onda baýyrsaq pen palaý ázirlenip, arnaıy qurylǵan shatyrlarda qaıyrymdylyq sharalary uıymdastyryldy. Mysaly, bıylǵy Naýryz merekesinde ǵalamtor jelisi arqyly elektrondy alleıada ekskýrsııa júrgiziletin kıiz úıler men «sheberler qalashyǵyna» degen qyzyǵýshylyq zor boldy. Olardyń ishinde oblystyq ólketaný mýzeıiniń qyzmetkerlerimen arnaıy kıiz úılerde ekskýrsııalar júrgizip, mamandar qala turǵyndaryna qazaq halqynyń salt-dástúrleri, ata-babalarymyzdyń ómir súrý salty týraly áńgimelep jatty. Bir sózben aıtqanda, etno-mádenı qalypta jasanǵan ár úıdiń qyrany kerilip, qumaıy erinip, tulpary kermede, suńqary bólmede bólek otyrdy. Bári tabıǵı. Merekeniń meıilinshe qyzǵan mezgilinde oblys turǵyndaryn aımaq basshysy Erlan Qoshanov quttyqtady.
– Naýryz – jańarý, jańǵyrý merekesi. Osynaý uly meıram qarsańynda memleketimiz de damýdyń jańa dáýirine qadam basyp otyr. El ómirinde oryn alyp otyrǵan saıası reformalar, ózgerister naýryz nyshandarymen úılesim taýyp keledi. Elbasymyz Nursultan Nazarbaevtyń sarabdal saıasaty bizdi bıik maqsattarǵa jeteleıdi. Jańa kúnde qaraǵandylyqtardyń aýyzbirshiligi men eńbekqorlyǵyn atap aıtqym keledi. Naýryz meramy asqaq armandar men jańa úmitterdiń merekesi, – dedi. Bıyl uıymdastyrýshylar qoıylym barysyndaǵy arnaıy effektilerge erekshe kóńil bólip, naqyshy bólek Naýryzdy qyzyldy-jasyldy gúlge kómkerdi. Qaraǵandylyqtar úshin bıylǵy jańalyqtardyń biri – túrli-tústi tútindi otshashý boldy. Al, ózenniń jaǵasynda ulttyq sport túrlerinen ótip jatqan túrli saıystar – ol óz aldyna jeke áńgime...
Sondaı-aq, súıinshili jaǵdaıdyń biri – Ulystyń uly kúni qarsańynda «Jas otbasylarǵa arnalǵan turǵyn úı» baǵyty boıynsha «О́ńirlerdi damytý 2020» Baǵdarlamasyna qatysqan jas otbasylarǵa Qaraǵandy qalasynyń ákimi Nurlan Áýbákirov jańa páterlerdiń kiltin tabystady. 108 páterdiń jańa ıeleri ataýly merekede qonys toıyn toılady. Ár sharshy metri 90 myń teńge turatyn baspanalardyń 72-si bir bólmeli, 36-sy eki bólmeli.
Ne kerek, kóshi kólikti, qosy kórikti Qyzyr ata Saryarqanyń sahı dala, arap qyryna osylaı jetti. Jármeńkeniń qyzǵany kúnniń yzbaryn eleń qylar emes. Merekelik kóńil-kúı meımanasy tasyǵan yntymaqty elge shattyq shýaǵyn qosa syıǵa bergen syńaıly. Bala máz, dala jaz.
Mıras Acan, «Egemen Qazaqstan»
Qaraǵandy
