Qostanaı memlekettik pedagogıkalyq ınstıtýtynyń kıiz úıine bas suqqandar qazaqtyń ulttyq buıymdarymen birge taǵamdarynyń túr-túrin qyzyqtady, dámaýyz tıdi. Árıne, onyń ishinde naýryz kóje men baýyrsaqty aldymen usyndy. «Qazaq halqy dastarhandy asa qurmettegen, qasıet tutqan. Ulttyq taǵamdardyń kópshiligi maldyń sútinen jasalǵany belgili. Olardyń umytylmaýy úshin irimshik, qurt, balqaımaq sekildi barlyq ulttyq taǵamdardyń jasalýyn jastar bilýi tıis» deıdi ustaz Saltanat Jaqaeva.
Merekede tigilgen aq boz úılerde tek qazaq halqynyń ǵana emes, Qazaqstandy otanym dep sanaıtyn barlyq ulystardyń da salt-dástúrlerin kórýge bolady. Mysaly, Qazaqstan halqy assambleıasy oblystyq fılıalynyń «Qoǵamdyq kelisim» úıi tikken aq boz úıde Qostanaıdaǵy barlyq ulttyq etno-mádenı ortalyqtar bas qosypty. Kıiz úıdiń syrtynda ózbek, tájik jáne taý halyqtary dıasporalarynyń ókilderi bıdi qyzdyrdy.
Qostanaı qalasynyń ortalyǵyna Naýryzdy merekeleýge jınalǵan qalalyqtar men qala qonaqtarynda esep joq deýge bolady. Ár kıiz úıge kirip, ulttyq naqyshtardy qyzyqtaýdyń ózi bir ǵanıbet. «Ahmet aýyly» dep ataǵan on eki qanat aq ordanyń aldynda qonaqjaılylyq tanytyp turǵan Ahań aýylynyń «el aǵasy» keıpine kirip, oqaly shapan jamylǵan A.Baıtursynov atyndaǵy Qostana ı memlekettik ýnıversıtetiniń prorektory Almas Ábsadyqov Naýryzdyń qadamy qutty bolsyn degen tilek aıtty. «Naýryz— halqymyzdyń jańa jyly. О́tken jyly elimizdiń Ata zańyna ózgerister men tolyqtyrýlar engizilgeni tarıhı oqıǵa bolyp tabylady. Bul elimizdiń ekonomıkalyq, saıası damýynyń aıǵaǵy. Aldaǵy ýaqytta da Naýryz elge qut syılaı bersin» deıdi Almas Ábsadyqov.
Naýryz – kún men túnniń teńelýi, jaratylystyń oıanýy, bereke bastaýy bolýmen birge aqyndardyń shabyt qaınary eken. Aqyn Aqylbek Shaıahmetov amandasqan jurtqa aıaq astynan: «Qalyń jurt ádemi kıingen, Myna bir kıiz úı desedi kútedi ákimdi, Naýryzym,halqym bar ózińe súıingen. Naýryzǵa kelgen jurt, árıne, aqyldy, Sondyqtan men-daǵy dalada turamyn qysqandaı taqymdy. Halqymnyń qonaqjaı peıilinen aınaldym, Beıtanys
bireýler «dám tat» dep shaqyrdy» dep sýyryp salyp, óleń joldaryn tógip jiberdi.
Aq boz úılerdiń saltanaty birinen biri ótedi. Degenmen Qostanaı qalalyq ákimdigi olardyń arasyndaı baıqaý uıymdastyryp, úzdiktiń úzdigin anyqtady. Beıtarap qazylar alqasy qaraı kele, birinshi oryndy A.Baıtursynov atyndaǵy Qostanaı memlekettik ýnıversıtetiniń aq ordasyna úıine laıyq dep tapty. Ekinshi orynda «EvrazKaspıanStal» JShS –niń aq boz úıine berdi. Úshinshi oryndy «Tazalyq-2012» jaýapkershiligi shekteýli seriktestigi tikken aq boz úı aldy. Sonymen qatar, Isker áıelder qaýymdastyǵynyń Qostanaı oblystyq fıdlıaly men Halyq banki aq boz úılerge eki atalym boıynsha syılyq daıyndapty. Otbasylyq qundylyqtardy nasıhattaý maqsatynda berilgen «Aq otaý» báıgesine
«Jolaýshylar tasymaly» aksıonerlik qoǵamy tikken úı laıyq dep tanyldy. Al halqymyzdyń qonaqjaılylyǵyn kórsetken Oblystyq kásipodaqtar ortalyǵynyń úıi Halyq bankiniń syılyǵyna ıe boldy.
Mereke baılanysty Qostanaı qalasynyń ortalyǵynda ótkizilgen Naýryz merekesinde oblystyq fılarmonııa men kórkemónerpazdar ujymdary án men bıden shashý shashty. Teatrlandyrylǵan kórinispen halqymyzdyń rýhanı qundylyqtarynyń barlyǵy qamtylyp kórsetildi.
Asyq atý, kúres, qol kúrestirý, jilik syndyrý, qoı kóterý sekildi ulttyq oıyndar mereke qyzyǵyn arttyra tústi. Merekede 18 qol óner sheberi ózderiniń jasaǵan kórpe, kórpeshe, nan taqtaı, aǵash ydystar, sabyn sekildi buıymdarynan kórme uıymdastyrdy. Olarǵa suranys ta kóp boldy.
Oblys, qala basshylary da aqboz úıler aýylyn aralap, naýryz qyzyǵyn kópshilikpen birge tamashalady.
Mereke besin aýǵanda da qyzyp jatty.
Názıra Járimbetova
«Egemen Qazaqstan»
