Baıqaýǵa týrızm jáne qonaq úı bıznesi fakýltetiniń 100-ge jýyq stýdenti qatysty. Is-sharanyń maqsaty gollandtyq týroperatorlar arasynda Qazaqstannyń týrıstik áleýetin ashyp kórsetý boldy. Baıqaý sheńberinde Qazaqstan jaıly kóptegen málimetter kóldeneń tartylyp, joǵary deńgeıde elimizdiń týrıstik áleýetiniń tusaýkeseri uıymdastyryldy jáne qazaqstandyq týrızm naryǵynyń jaǵdaıy men damý bolashaǵy tanystyryldy.
«Qazaqstandaǵy ekotýrızm» atty jobany usynǵan komanda baıqaý jeńimpazy bolyp tanyldy. Jobada negizgi mádenı kórikti jerler, Uly Dalanyń tabıǵı peızajy men landshaftarynyń alýan túrliligi, ejelgi tarıhı muralary men zamanaýı arhıtektýralary beınelengen.
Is-shara kezinde ekotýrızmdi damytý, qorshaǵan orta men tabıǵı resýrstardy qorǵaý, sondaı-aq, Astanadaǵy EKSPO-2017 halyqaralyq mamandandyrylǵan kórmesiniń tusaýkeserine de erekshe nazar aýdaryldy, dep habarlady Qazaqstan Respýblıkasy Syrtqy ister mınıstrliginiń baspasóz qyzmeti.
