Kúnder óte kele qos qarlyǵashtyń salǵan uıasynan saryaýyz balapandardyń shyqylyqtaǵan únderi de estile bastady. Endi qos qarlyǵashtyń kezekpen kezek jedeldete balapandaryna synǵan tereze arqyly azyq tasýlary da údeıe tústi. Biraq, synǵan tereze áıneginiń úshkir qyrlarynyń ushtary balapandaryna tynbastan azyq tasyp júrgen qos qarlyǵashtyń biriniń ómirin qıyp jibergendigi ókinishti boldy.
Baýyryn áınektiń synyǵy tilip jibergen, qyzyl qanǵa boıala shalqasynan ólip jatqan qarlyǵashty kórgen Tólegen de óziniń úlken qatelik jibergendigine, áınekti der kezinde aýystyrmaǵan salaqtyǵyna ókinip, barmaǵyn tistegen kúıinde turyp qaldy.
Tólegen endi jalǵyz qalǵan qarlyǵashtyń qandaı kúıde bolaryn, kúndelikti tirligin qadaǵalaı bastady. Synǵan áınektiń úshkir kózderin alyp tastaýdy da umytpady.
Aqyrynda jalǵyz qalǵan qarlyǵashtyń uıadaǵy on balapandy bir ózi tynymsyz azyqtandyryp, qanattandyryp ushyryp shyǵarǵandyǵyn kórgen Tólegen qarlyǵashtyń tipti keıbir adam balasynyń ózi jasaı almaıtyn qamqorlyǵyna tań-tamasha boldy.
Tastandy balalar sanyn kóbeıtip júrgen bezbúırek analarǵa qaraǵanda, qarlyǵashtyń bul isi kim-kimdi bolsa da oılandyratyn jaǵdaı edi.
Músirbek AITAShEV
Batys Qazaqstan oblysy,
Syrym aýdany
