Ortalyq kommýnıkasııalar qyzmetinde ótken brıfıng barysynda Bilim jáne ǵylym vıse-mınıstri E.Sýhanberdıeva komıssııa jumysynyń obektıvtiligin jáne ashyqtyǵyn qamtamasyz etý maqsatynda komıssııalar quramy anaǵurlym keńeıtilip, nyǵaıtylǵanyn atap ótti.
«17 pándik komıssııa quryldy jáne olardyń quramynda bilim berý salasynyń 126 bilikti mamany boldy. Sonymen qatar, komıssııa quramyna Parlament Májilisiniń depýtattary, úkimettik emes uıymdardyń ókilderi de endi. Komıssııalardyń qaraýyna mektepke deıingi tárbıe jáne oqytý deńgeıine arnalǵan oqý ádebıetteriniń 1010 atalymy,
2, 5 jáne 7-synyptarǵa arnalǵan oqýlyqtar men oqý-ádistemelik keshender, arnaıy (korreksııalyq) mektepterge arnalǵan oqý ádebıetteri, qosymsha ádebıetter jáne elektrondy tasymaldaǵyshtardaǵy oqý basylymdary usynyldy. Sonyń ishinde 197-si oqýlyq», – dedi mınıstrdiń orynbasary.
Pándik komıssııa músheleri oqýlyqtardy synaqtan ótkizý men qoǵamdyq baǵalaý qorytyndylaryn jáne ǵylymı-pedagogıkalyq saraptama nátıjelerin taldap, Respýblıkalyq komıssııa qaraýyna bilim berý uıymdarynda paıdalanýǵa usynylatyn oqý ádebıetteri jóninde usynystar engizdi.
Vıse-mınıstrdiń aıtýynsha, respýblıkalyq jáne pándik komıssııalar 2-synypqa arnalǵan biryńǵaı bazalyq oqýlyqtardy, 5 jáne 7-synyptarǵa arnalǵan balamaly oqýlyqtar men oqý-ádistemelik keshenderdi, mektepke deıingi tárbıe jáne oqytý deńgeıine, arnaıy mektepterge arnalǵan basylymdardy jáne basqa da qosymsha ádebıetterdi iriktep aldy. Otyrysqa qatysýshylar oqý ádebıetterin ázirleýdi, saraptaýdy jáne irikteýdi ári qaraı jaqsartý úshin naqty usynystaryn bildirdi.
Aıdar О́risbaev,
«Egemen Qazaqstan»
