Aqylbek Kamaldınov aýǵanstandyq áriptesterine Qazaqstandaǵy saıası jáne áleýmettik-ekonomıkalyq jańǵyrýlar týraly, Elbasynyń Joldaýy jóninde baıandap berdi. Ol elimizde ótkiziletin halyqaralyq sharalarǵa, atap aıtqanda, Shanhaı yntymaqtastyq uıymynyń sammıti, Islam yntymaqtastyǵy uıymy, EKSPO-2017 syndy sharalarǵa Aýǵanstannyń qatysýy mańyzdy ekenin aıtty. Ystanbul prosesi, Aýǵanstan boıynsha aımaqtyq ekonomıkalyq yntymaqtastyq, BUU-nyń Ortalyq Azııa ekonomıkasyna arnalǵan baǵdarlamasy syndy Aýǵanstanǵa qatysy bar kóptegen halyqaralyq jáne aımaqtyq baǵdarlamalarǵa elimizdiń belsene qatysyp jatqanyna da toqtaldy.
О́z kezeginde, Hekmat Halıl Karzaı Qazaqstannyń BUU Qaýipsizdik Keńesiniń turaqty emes múshesi bolyp saılanýyna oraı quttyqtaýyn jetkizdi. Ol osy saılaýda Aýǵanstannyń esh oılanbastan Qazaqstan úshin daýys bergenin, aldaǵy ýaqytta elimizdiń Qaýipsizdik Keńesindegi bastamalary men jumysyn qoldaýǵa ázir ekenin aıtty.
– Biz Qazaqstannyń Aýǵanstanǵa kórsetken kómekteri úshin alǵys bildiremiz. Aýǵan eli qıyndyqqa ushyraǵanda sizder demeý bolyp, qalyptasqan problemalardy sheshýge kómek berdińizder. Sizder aýǵan jastaryna kóptegen stıpendııa taǵaıyndap, Qazaqstannyń betke ustar oqý oryndarynda bilim alýyna jaǵdaı jasadyńyzdar. Aýǵan jastary túrli ǵylym salalary boıynsha sapaly bilim alýda, olar kúni erteń óz elin alǵa súıreıdi dep senemin, – dedi Hekmat Halıl Karzaı.
Aıta keteıik, 2009 jyly Qazaqstan Memlekettik bilim berý baǵdarlamasynyń aıasynda aýǵanstandyq myń stýdentke bizdiń elimizde joǵary jáne orta-tehnıkalyq bilim alýǵa jaǵdaı jasalǵan bolatyn. Sondaı-aq, sol elde áleýmettik mańyzy bar ınfraqurylymdardy qalpyna keltirý úshin gýmanıtarlyq kómek kórsetken edi.
Hekmat Halıl Karzaı Qazaqstannyń 2 mıllıon dollar ınvestısııasy úshin alǵys bildirip, bul qarjy biraz máseleni sheshýge kómekteskenin aıtty. Onyń aıtýynsha, Aýǵanstannyń Ulttyq birlik úkimeti eldegi ahýaldy turaqtandyrý úshin barlyq kúsh-jigerin jumsaýda.
Konsýltasııa kezinde taraptar Aýǵanstan Islam Respýblıkasynyń prezıdenti Mohammad Ashraf Ganıdiń 2015 jyly Qazaqstanǵa jasaǵan resmı sapary aıasynda qol jetkizilgen kelisimderdiń júzege asyrylý barysyn talqylady. Halyqaralyq kún tártibinde turǵan ózge de ózekti máseleler boıynsha ózara pikir almasty.
Arnur ASQAR,
«Egemen Qazaqstan»
