Orasan qarajatty qajet etse de, bul kúnde Almatynyń qara bazarlary birtindep kelmeske ketýde. Ortalyqtaǵy burynǵy saýda oryndary da jańartylýda. Qysqasy, bul iste ilgerileý bar.
Máselen, qala ákimi Baýyrjan Baıbek jumys babynda qalanyń jańarǵan saýda bazarlarynyń jumystaryn tekserdi. Jurttyń bári biletin «Kók bazar» saýda ortalyǵynda jáne zamanaýı talap-kelbetke ıe «Mizam» atty alǵashqy kóterme-taratý ortalyǵynda boldy. Satýshyǵa da, saýdalasýshyǵa da barynsha yńǵaıly etip salynǵan «Mizam» bazary álemge tanymal fransýzdyń ataqty «Ranjıs» bazarynyń jobasyna negizdelgen.
«Bul joba memleket-jekemenshik seriktestiginiń shynaıy úlgisi. Osy jobany qala qurylysy keńesinde qorǵaǵan kezde biz bazar eń arzan bolady dep ýáde bergen edik, osy saıasatty ustanamyz», dedi «Mizam» ortalyǵynyń bas dırektory Dosmuhan Kerimbaev
«Mizamnyń» negizgi tujyrymdamalarynyń biri – jetkizýshilermen aradaǵy deldalsyz, tikeleı jumys isteý, nátıjesinde taýar baǵasy tómen. Joba memleket-jekemenshik seriktestigi negizinde júzege asty, qurylys tolyq jeke ınvestısııa esebinen salyndy. Joba quny 3,1 mlrd teńge jáne munda 2 myńǵa jýyq jumys orny qurylǵan.
Almaty ákimi saýda bazarlaryn jańartý baǵdarlamasy aıasynda bıylǵy jyldyń aqpan aıynda iske qosylǵan «Kók bazar» saýda ortalyǵyn da aralap shyqty. Pavılon alańy 20 myń sharshy metr, onyń 10 myń sharshy metrine saýda alańy ornalasqan. Bazardyń ekinshi bóliginde 400 oryndy eki qabatty parkıng bar. Jobanyń quny 2,5 mlrd teńgeni quraıdy. Jańarǵan bazarda 500-den astam jańa jumys orny paıda boldy.
Osylaısha Almatyda saýda oryndaryn qaýipsizdik pen sanıtarlyq normanyń barlyq talaptaryna saı keletindeı etip jańa formatqa kóshirý jumystary keń qarqyn alýda.
Aınash ESALI,
«Egemen Qazaqstan»
ALMATY
