Teńiz jaǵalaýy, bólme ishi. Osyndaı eki-aq kórinisten turatyn qoıylymda úsh qana akter oınaıdy. Qyryqtan asqan qaltaly jigitke amalsyz qosylǵan boıjetken tolqyny týlap, alasurǵan teńiz jaǵasynda jany jaı tappaı, ózi de sol teńizdeı alasurady. Ony «Balaqaı» dep ataıtyn baı jigit bir mezette balyq aýlaýǵa ketedi. Mine, osy kezde ózin baqytsyz sanaıtyn boıjetken jaǵalaýda dál ózindeı ómirden óz ornyn tappaı, del-sal kúı keship júrgen teńizshi jigitti jolyqtyrady. Syrlasady. Ashyq teńizde jolaýshylar mingen kemeni qutqaramyz dep qos joldasymen birge katermen radıasııalyq aımaqty kesip ótip, aıyqpas dertke ushyraǵan Ázız esimdi jigit onyń ómirin, oı-sanasyn kúrt ózgertedi. Qoıylym sońynda úsheýi úsh jaqqa ketedi. Názıdiń názik janyn terbegen, ózine yntyq etken jigit dúnıeden ótedi, «mahabbat degen erkindik. Men saǵan úılenbeımin, úılensem, erkindigimnen aıyrylyp qalamyn» dep masaıraıtyn Eskendir aqyr aıaǵynda «ketpe» dep qyzdyń aıaǵyn qushyp jalynǵanymen, óziniń baqyty úshin batyl qadamǵa bel býǵan boıjetken basqa qalaǵa ketedi.
− Mundaı taǵdyr qazir bizdiń kóptegen qyzdarymyzdyń basynda bolýy múmkin. Bolmasa da, Názıdiń ornynda bolýdy armandaıtyn, armandap ketken, «másele – nekede emes» dep baı adamnyń qasynda júrgisi keletin arýlarymyz az emes. Sondyqtan osy taqyryp meni qatty tolǵandyrdy. О́z taǵdyryn ózi ózgertken qyzdy sahnaǵa alyp shyqqym keldi, – deıdi qoıylym rejısseri Saılaý Qamıev. Ol túpnusqasy «Dýel» dep atalatyn bul týyndynyń atyn «Názı» dep ózgertip, orys tilinen qaıta aýdaryp shyqqanyn aıtty.
Muńǵa toly melodramada Jastar teatrynyń úsh akteri – Aıdos Nurmaǵambetov, Erjan Amantaev pen Maqpal Eltaıqyzy óz keıipkerlerin barynsha ashýǵa tyrysty.
«Bul qoıylymǵa 18 kún daıyndaldyq. Názı − psıhologııalyq jaǵynan kúrdeli ról. Buǵan deıingi qoıylymdarda minezi shaıqy, doly qyz-kelinshekterdiń rólderin somdadym. Búgin óskemendik kórermenderge basqa qyrynan kórindim dep oılaımyn. Másele – basty rólde emes, onyń kúrdeliliginde, adam janynyń ishki ıirimderine tereń boılaýynda», – dedi Názıdi beınelegen aktrısa Maqpal Eltaıqyzy.
«Bul akterdi, aktrısany jan-jaqty ashatyn qoıylym. Úsh adamnyń úsh túrli pozısııasy bar, úsh túrli kózqarasy bar, úsh túrli shyndyǵy bar. Árqaısysy óziniń shyndyǵyn ashýǵa tyrysty», deıdi Eskendir rólin oınaǵan akter Aıdos Nurmaǵambetov.
Azamat QASYM,
«Egemen Qazaqstan»
О́skemen
