Munda qant dıabetimen syrqattanatyn naýqastarǵa zamanaýı emdeý jáne dıagnostıka tásilderi qoldanylady. Naýqastardyń glıkemııalyq kórsetkishterin táýlik boıyna 288 ret anyqtaý arqyly únemi úzdiksiz baqylaýǵa múmkindik beretin SGMS qurylǵysy bar. Sonymen qatar «Dıabet mektebin» arnaıy daıyndyqtan ótken ınstrýktorlar júrgizedi.
Aımaqtyq dıabet ortalyǵy ornalasqan oblystyq endokrınologııa dıspanserinde qyzmet atqaratyn dárgerlerdiń 60 paıyzǵa jýyǵy joǵarǵy sanatty bilikti mamandar. Naýqastarǵa endokrınolog-dıabetologtarmen qatar nefrolog, kardıolog, oftalmolog, nevropatolog, angıohırýrg dárigerler medısınalyq kómek kórsetedi.
Dıspanser dárigerleri jyl saıyn biliktiligin arttyrýda. Máselen, ótken jyly 2 dáriger-endokrınolog Reseıdiń «Sankt-Peterbýrg kóp salaly ortalyǵynda» aıaq tamyrlary patologııasyna ýltra dybystyq dıagnostıka sıklynda biliktiligin jetildirdi. Taǵy 1 dáriger sol Sankt-Peterbýrgte «Jińishke ınelik aspırasıondy bıopsııa málimetteri boıynsha qalqansha beziniń morfologııalyq dıagnostıkasynda», 25 dáriger respýblıka deńgeıinde biliktiligin arttyrdy.
Oblystyq endokrınologııa dıspanseri medısınalyq kolledjder men joǵary oqý oryndary medısınalyq fakýltetteriniń klınıkalyq bazasy bolyp tabylady. Munda naýqastardy emdeýmen qatar dıabetologııa máseleleri boıynsha semınarlar, konferensııalar men kezdesýler uıymdastyrylyp turady. Qant dıabeti mektebiniń jattyqtyrýshylaryn daıarlaıdy. Salaýatty ómir saltyn nasıhattaý, semizdikti aldyn-alý dıabet mektebinde oqytylady.
Elimizde qant dıabetine qarsy kúresti uıymdastyrýda salaýatty ómir saltyn qalyptastyrý máselelerine úlken mán berilýde. Osy maqsatta ashylǵan Aımaqtyq dıabet ortalyǵy aýrýdyń paıda bolý qaýpin azaıtýǵa jáne dıabettik retınopatııa, nefropatııa, nevropatııa, dıabettik taban sekildi qaýipti asqynýlardyń aldyn-alýǵa kómektesedi.
