Kezdesý barysynda Memleket basshysyna Ulttyq banktiń 2016 jylǵy qyzmetiniń qorytyndylary jóninde esep berilip, aldaǵy kezeńge arnalǵan josparlar tanystyryldy.
Sondaı-aq, keńeske Qazaqstan Prezıdentiniń áleýmettik-ekonomıkalyq máseleler jónindegi kómekshisi Á.Smaıylov, Ulttyq bank tóraǵasy D.Aqyshev, Ulttyq ekonomıka mınıstri T.Súleımenov, Qarjy mınıstri B.Sultanov jáne Ulttyq bank tóraǵasynyń orynbasarlary qatysty.
Nursultan Nazarbaev álemdik ekonomıkalyq daǵdarys jaǵdaıynda Ulttyq bank pen elimizdiń qarjy júıesi turaqty jumys istep jatqanyn atap ótti.
– «Qazaqstannyń úshinshi jańǵyrýy: jahandyq básekege qabilettilik» atty joldaýda Úkimet pen Ulttyq banktiń aldyna álemniń damyǵan 30 eliniń qataryna qosylý jóninde mindet qoıyldy. Ol úshin Ońtústik Koreıa sııaqty álemniń birqatar elderiniń tabysty tájirıbesine súıený qajet. Biraq ınflıasııany kezeń-kezeńimen tómendetý 3-4% deńgeıinde bolýǵa tıis, – dedi Qazaqstan Prezıdenti.
Elbasy qarjy sektoryndaǵy turaqtylyqqa qaýip tóndirip otyrǵan, únemi kezdesetin qaterlerge nazar aýdaryp, ulttyq ekonomıkany damytýdyń qazirgi qarqyny jetkiziliksiz ekenin aıtty.
– Bul máseleni sheshý úshin makroekonomıkalyq turaqtylyqqa, bank sektoryn saýyqtyrýǵa jáne qor naryǵyn damytýǵa baǵyttalǵan sharalar qabyldaý qajet. Qoıylǵan mindetterdi iske asyrýda Ulttyq bank basty ról atqarady, – dedi Memleket basshysy.
D.Aqyshevtiń málimetine sáıkes, 2016 jyldyń qorytyndysy boıynsha ınflıasııa 13,6%-dan 8,5%-ǵa tómendegen. Bıylǵy naýryzda bul kórsetkish 7,7% boldy.
– 2017 jyldyń sońynda ınflıasııa deńgeıi 7%-ǵa jetip, 2018 jyly odan ári tómendeıdi dep josparlanýda. Inflıasııa qarqyny báseńdep keledi. Aıyrbas baǵamynyń azdaǵan aýytqýlary oryn alyp otyr. Bul rette ol tolyǵymen negizgi faktorlarǵa táýeldi. Ulttyq bank tarapynan byltyrǵy qyrkúıekten bastap ıntervensııa júrgizilmegenin atap ótken jón, – dedi Ulttyq bank tóraǵasy.
Nursultan Nazarbaevqa 14 mlrd AQSh dollary kóleminde rekordtyq mólsherdegi shetel ınvestısııasy kelgeni jáne elimizdiń syrtqy qaryzy azaıǵany týraly málimdeldi.
D.Aqyshev Qazaqstan Prezıdentine Ulttyq bank pen Ulttyq qor rezervteriniń ahýaly, monetarlyq saıasattyń iske asyrylý barysy, valıýta naryǵynyń jaǵdaıy, bank sektory men qor naryǵynyń damýy, Biryńǵaı jınaqtaýshy zeınetaqy qorynyń qyzmeti, bank kórsetetin qyzmetterdiń sıfrlandyrylýy, sondaı-aq osy saladaǵy jańa syn-qaterler týraly baıandady.
– Elimizdiń bank sektoryn saýyqtyrý jóninde sharalar qabyldaýdy tezdetý kerek. Qajet bolǵan jaǵdaıda, aksıonerler óz bankterin naqty aqsha arqyly qaıta kapıtaldandyrýǵa tıis. Sondaı-aq, olar álsiz bankterdi biriktirýge beıimdelýi tıis, – dedi Elbasy.
Memleket basshysy ıpotekalyq qaryz problemalaryn qaıta qarjylandyrý baǵdarlamasynyń iske asyrylý máselelerine erekshe toqtalyp, azamattardyń qarjylyq jaýapkershiligin arttyrýdyń mańyzdylyǵyn atap ótti.
Kezdesý sońynda Nursultan Nazarbaev D.Aqyshev usynǵan esepti maquldap, birqatar naqty tapsyrma berdi.
– Úkimet pen Ulttyq bankke buǵan deıin júktelgen mindetterdi sheshý jóninde kelisilgen is-qımyldar ázirleý tapsyrylady. Otandyq jáne halyqaralyq deńgeıdegi byltyrǵy tájirıbeni eskerip, aıyrbas baǵamy ózgerýiniń túrli jaǵdaıyndaǵy is-qımyldyń naqty algorıtmi pysyqtalsyn. Ekonomıkany uzaq merzimge nesıeleý kólemin artyrý maqsatymen shuǵyl depozıtterdi kóbeıtý sharalary ázirlensin. Qor naryǵyn damytý jónindegi jumystardy jandandyryp, valıýtalyq jáne ıpotekalyq qaryz alýshylardyń problemalaryn sheshý jóninde usynystar engizilsin, – dedi Qazaqstan Prezıdenti.
