Árbir jemqor jaýap beredi

Elbasy Nursultan Nazarbaevtyń taıaýdaǵy saılaýda jarqyn jeńiske jetýiniń bir syry – keıingi jyldarda elimizde sybaılas jemqorlyqpen kúres maıdany ashylyp, halyqtyń ádilettilikke senimi arta túskendigi, osy iske Prezıdenttiń erekshe nazar aýdarýy deýge de bolady. Qoǵamdy ishten iritetin osy masqara qubylyspen kúres óziniń naqty nátıjesin berip te otyr. Úsh jyldyń ishinde bizdiń elimiz álemdik antıkorrýpsııalyq reıtıngtegi kórsetkishin birden 45 satyǵa jaqsartty. Bul arqyly TMD boıynsha Qazaqstan ǵana úzdik oryndy ıelenip tur. Sońǵy jyldary osy organnyń quzyrly qyzmeti arqasynda qarmaqqa tek “shabaqtar” ǵana emes, iri “shortandar” da iligip, jemqorlardyń jeligi basylǵandaı boldy. О́tken jyly aldyńǵy jyldarǵa qaraǵanda para alý jaǵdaılary 28 paıyzǵa kóp anyqtaldy. Segiz júzden astam sybaılas jemqorlar isi sotqa berildi, olardyń arasynda joǵary laýazymdy sheneýnikter kóp boldy. Ústimizdegi jyly Joǵarǵy Sottyń alty birdeı sýdıasy qarmaqqa ilindi. Osyndaı orasan eńbektiń arqasynda jemqorlyq qylmystardan memleketke kelgen 3,7 mıllıard teńge shyǵyn qaıtaryldy. Mine, osy el, halyq úshin atqarylyp jatqan isterdiń basy-qasynda júrgen Ekonomıkalyq qylmysqa jáne sybaılas jemqorlyqqa qarsy kúres agenttigi tóraǵasynyń orynbasary Sáttibek OŃǴARBAEVQA jolyǵyp, birqatar suraqtarymyzǵa jaýap qaıtarýyn suraǵan edik. – Sáttibek Ońǵarbaıuly, zaman aǵy­myna oraı qazirgi ýaqytta kez kelgen eldiń atyn da shyǵaratyn, zatyn da óshi­retin jemqorlyq bolyp otyr. Jemqorlyǵy orasan eldiń jamandyǵy janyn jaılaǵandyqtan onyń joǵary izgilikti ister atqarý qataryna qosy­lýy da qıyn. Bul turǵydan alǵanda bizdiń elimizdiń sybaılas jemqorlyqqa qarsy zańnamasy jáne qoldanystaǵy áreketterimiz de eń tıimdilerdiń biri dep tanylǵany kóńil qýantady. – Iá, búgingi tańda, Elbasymyz aıtyp ótkendeı, sybaılas jemqorlyqpen bitispes kúres júrip jatyr. Jemqorlyq jaı­la­ǵan elde ádilet saltanat qurmaıtyny bel­gili. Sondyqtan birde-bir memlekette bul qaýipti keseldiń betin bizdegideı tez qaıtaratyndaı amal iske asqan joq. Tek eki jyldyń ishinde kóptegen res­pýb­lı­kalyq deńgeıdegi jetekshi, oblystyq jáne qalalyq aýqymdaǵy birneshe laýazymdy tul­ǵalar qylmystyq jaýapkershilikke tar­tyldy. Bulardyń arasynda ákimder men olardyń orynbasarlary bar. Mınıstrler, vıse-mınıstrler, túrli kompanııa pre­zıdentteri men agenttik tóraıymy jáne t.b. laýazymdy sheneýnikterge jem­qor­­lyǵyna baılanysty qylmystyq is qoz­ǵaldy. Munyń bári, joǵaryda aıtyp ótkendeı, zańdarymyzdyń jetilgeni jáne sol zańǵa sáıkes bizdiń áreketterimizdiń nátıjesi. Biraq endi shortandar qarmaqqa iligip jatqan kezde basqa birqatar laýa­zym­dy tulǵalar múddelilik tanytyp, olar­­ǵa arasha túsetin boldy. Bıik minbeden Elbasy bul máseleni de qozǵap ótti. Tergeýdiń áli aq-qarasy shyǵarylmaı ja­typ korrýpsııa belgisimen qarmaqqa ilikken janǵa jaqtasyp, aıypsyz nemese ja­zyq­syz dep sonyń ǵana soıylyn soǵyp joǵary deńgeıde shý kóterý – zańǵa qaıshy áreket. Tergeý aıaqtalǵan soń onyń zań­dy­ly­ǵyn prokýratýra qadaǵalaıdy, sot tal­qylaıdy. Sol kezde adamnyń aıyby bar ma, joq pa naqty aıqyndalady. Jazyqsyz aıypqa tartylǵan bolsa, qarjy polısııa­sy­nyń tergeýshisi jaýap beredi. Al zań oryndary shynymen ony aıypty dep tapsa, onda qylmysker qamalýy kerek. Biraq buǵan kedergi jasaǵysy keletin adam­dardyń túpki múddesin ańǵarý da qıyn emes. Sondyqtan jemqorlyqpen kúres qashanda ymyrasyzdyqpen jalǵastyryla beretindigin kimde-kim jete uǵynýy tıis. – Demek, halyq aıtsa qalt aıt­paı­dy degendeı, sheneýnikter, ásirese laýa­zymdy tulǵalar arasynda jemqorlar kóp degen áńgimeniń rastyǵy qazir kún­nen-kúnge aıqyndala túsýde. Qolyna se­nip tapsyrylǵan bılikti aram nıetimen almastyrǵan adam ǵana qalaıda aqsha jasaýdyń jolyn jaǵalaıdy. Son­dyqtan bul joldaǵy adamdardyń ba­rynsha tezdetip anyqtalyp, ustalyp jatqandyǵyn álemdik sarapshylar da joǵary baǵalap otyr ǵoı. – Iá, sybaılas jemqorlyqpen kúres jolyndaǵy isimizge baǵa berip jatqan bizdiń ózimiz emes, halqymyz ben halyq­ara­lyq sarapshylar qoǵamy. Jemqorlarǵa qashanda, eń aldymen, halyq qarsy. Al dúnıejúzi memleketterindegi jemqorlyq deńgeıin zertteıtin «Transparensı Interneshnl» halyqaralyq uıymy Qa­zaq­stan­daǵy jemqorlyqqa qarsy kúres ba­rysyn bir sát te nazardan tys qal­dyr­mady. Bul saraptama ortalyǵy damýshy elderdiń quqyqtyq deńgeıin, qylmyspen kúres barysyn tarazy basyna tartyp, ózindik ólshem nátıjesin shyǵarady. Sóı­tip bizdiń isimizge olar oń baǵa berdi. Ony sońǵy jyldary korrýpsııamen ustalǵan joǵary laýazymdy tulǵalardyń sany da, sapasy da dáleldeıdi. Al halyqaralyq sa­rapshylardyń sonshama basymdyq berip otyrǵany olardy, birinshiden, bizdiń elimizdegi korrýpsııaǵa qarsy qoldanylatyn zańdarymyzdyń deńgeıi qanaǵattandyra­dy. Jalpy burynǵy TMD elderi arasyn­da birinshi ret sybaılas jemqorlyqqa qarsy zań bizdiń elimizde qabyldanyp, shyn máninde júzege asqany belgili. Memlekettik qyzmetkerdiń adamgershilik qasıetteri men iskerlik tazalyǵyn art­tyrý maqsatynda 2005 jyly Elbasynyń Jarlyǵymen halyqaralyq standarttarǵa tolyqtaı jaýap beretin Ar-namys kodeksi qabyldandy. Sóıtip, bizdiń Elbasynyń tikeleı saıası erik-jigeriniń arqasynda jáne Qazaqstannyń memlekettik basqarý organdarynyń atsalysýymen elimizde jemqorlyqqa qarsy kúrestiń tolyqqandy júıesi quryldy. Atap óterlik jáıt, osy zańdardyń barlyǵy azamattardyń quqy men bostandyǵyn saqtaýǵa baǵyttalǵan. Korrýpsııamen kúres týraly BUU kon­ven­sııalaryna qol qoıyldy. Bular birneshe eldiń quqyqtyq múddesi kózdelgen, maz­muny tereń qujattar bolyp tabylady. Osy qujattarǵa biz qol qoıǵannan keıin sol eldermen quqyqtyq qarym-qatynasta bolýymyz qajet. Iаǵnı, bizdiń elde bireýler qylmys jasap qashyp ketken jaǵ­daı­da olardy izdeýge, taýyp ákelýge múm­kin­dik týady. Tek ol qylmyskerlerdiń ózde­rin ǵana emes, sonymen qatar qymqyrǵan dúnıe-múlikterin de qaıtarýǵa jaǵdaı ja­salady. Mine osyndaı kóptegen ońdy óz­geristerdi baqylap, syrttan kórip otyr­ǵan halyqaralyq qaýymdastyq antıkor­rýp­sııalyq reıtıng boıynsha bizdiń eldiń kórsetkishi jaqsarǵanyn saralap shyǵaryp, joǵary baǵa berdi. – Osy arada jalpy atqarylǵan jumystarǵa naqty toqtalyp ótseńiz. – Qylmystyq áreketterge qarsy shara­lar­dy qabyldaı otyryp, biz sońǵy ná­tı­jege, ıaǵnı azamattyń konstıtýsııalyq qu­qy buzylmaı qylmystyq istiń sotqa jetkizilýine basa mán beremiz. О́tken jyly qarjy polısııasynyń óndirisinde 13 997 qylmystyq is boldy. Onyń 11 556-sy aıaq­talyp, 9 421-i sotqa jiberildi. Sol sııaq­ty osy aralyqta tórt myńǵa jýyq ekonomıkalyq qylmys anyqtaldy. Taldaý kórsetkendeı, sońǵy bes jyldyń ishinde azamattardyń konstıtýsııalyq quqyn buzýshylyq eki esege azaıǵany baıqaldy. Eger 2006 jyly 102 zań buzýshylyq kó­rinis berse, ótken jyly 52 derek tirkeldi. Sóıtip, jalpy keltirilgen 198,9 mlrd.teńge zııannyń 100,9 mlrd.teńgesi óteldi. Bular qurǵaq sıfrlar emes, olardyń ar­tynda osy sandarǵa jaýapty jemqor­lar­dyń da turǵany belgili. Memlekettik or­gan­dardyń ortalyq apparattarynyń bir­qatar basshylarynyń ústinen qozǵalǵan qylmystyq ister aıaqtaldy. Máselen, Statıstıka jónindegi agenttik tóraǵasynyń orynbasarlary Baıanov pen Meńdibaev halyqtyń ulttyq sanaǵyn ótkizýge dep bólingen 758 mln. teńgeni jymqyrǵany úshin, iri kólemde para bergeni úshin Tótenshe jaǵdaılar vıse-mınıstri Sabdalın, para alǵandary úshin Atom energetıkasy jónindegi komıtettiń eks­port­tyq baqylaý basqarmasynyń bastyǵy Turmahan, Indýstrııa jáne saýda mınıstrligi saýda komıteti basqarmasynyń bas­ty­ǵy Túzelbaev, bılikti asyra paıdalan­ǵany úshin UQK departamentiniń bastyǵy Ábenov, bılikti asyra paıdalan­ǵany jáne bıýdjet qarjysyn iri kólemde jym­qyr­ǵany úshin Aýyl sharýashylyǵy mınıstrligi memlekettik ınspeksııa komı­tetiniń tóraǵasy Súleımenov, bıýdjet qarjysyn iri kólemde jymqyrǵany úshin Kólik jáne kommýnıkasııa mınıstrligi kólik baqylaý komıtetiniń tóraǵasy Jań­byrbaev jáne t.b. birqatar adamdar birneshe jylǵa sottalyp tyndy. Al bulardan da iri shortandardyń qarmaqqa ilikkenin Elbasy Joldaýynda keltirip ketkendikten ony qaıtalamaı-aq qoıaıyn. Jalpy, jemqorlyq qylmystarynyń kóbin ákimdik qyzmetkerleri jasaıtyny belgili bolyp otyr. Odan keıin ishki ister or­gandary, salyq qyzmeti, ádilet organ­dary, sot ákimshiligi jónindegi komıtet, keden organdary jáne basqa da vedomstvolar bolyp jalǵasyp kete beredi. Máselen, Ońtústik Qazaqstan oblysy ekonomıka jáne bıýdjettik josparlaý departamenti dırektorynyń orynbasary Mamytbekova 58 myń AQSh dollary jáne osy ob­lystyń qurylys departamenti dırektory Sábdenov 4 mln. teńge para alǵandary úshin birneshe jylǵa sottaldy. Qyzyl­orda, Jambyl jáne Ońtústik Qazaqstan oblystary boıynsha aýmaqaralyq jer ınspeksııasynyń bastyǵy Aıýbekov laýa­zym­dy qyzmetin jeke bas múddesine paı­dalanyp, Báıdibek aýdanynyń aımaǵynda kásiptik qyzmetpen aınalysýǵa jer telimin bólýge «kómegin» tıgizgeni úshin 10 mln. AQSh dollaryn alyp, sottaldy. Sol sııaqty Jambyl oblystyq qazynashylyq departamenti bastyǵynyń orynbasary Ájibaev bıýdjettiń 1,2 mln. teńgesin jym­qyryp sotty boldy. Al Qorshaǵan or­tany qorǵaý mınıstrliginiń baqylaý jáne tabıǵı retteý komıteti «Tobyl-Tor­ǵaı ekologııa departamenti» MM bastyǵy Dadın Aqtóbe oblysynda josparlanǵan tekseristiń nátıjesi durys bolýy jáne keıin JShS-nyń qyzmetine eshkim ara­laspaýy maqsatynda para alǵany úshin on bir jylǵa sottaldy. Aıta berse, mundaı mysaldar óte kóp. – Al úlesker azamattardyń múddesin qorǵaý baǵytynda qurylys salýshy­lar­dyń zańsyz áreketterine qalaı toı­tarys berilýde? – Kópshiligi Astana men Almaty qala­larynda ornalasqan 55 qurylys uıymy­nyń 82 basshysyna baılanysty 2006 jyl­dan beri 59 qylmystyq is qozǵaldy. Olardan kelgen 100,7 mlrd. teńge shy­ǵynnyń ornyn toltyrý maqsatynda kináli adamdardyń 70,8 mlrd. teńge turatyn múlikterine toqtam salyndy. Bul isterdi qaraǵan sot 32 is boıynsha aıyptaý úkimin shyǵaryp, soǵan baılanysty 67 adam sottaldy. – Bul qoldy bolǵan aqshalardyń orny qaıtip toltyrylady? – Munyń bári jazyqsyz jandarǵa keltirilgen shyǵyndar. Sondyqtan biz jábir­lengenderdiń shyǵynyn toltyrý maqsa­tynda kináli úı salýshylardyń múlkine toqtam salý sharalaryn qarastyryp kelemiz. Bul oraıda, meniń oıymsha, úlesker­lerdiń máselesin túpkilikti baıandy etý úshin, ıaǵnı jábirlengen úleskerlerdiń shyǵynyn tolyqtaı qaıtarý maqsatynda toqtam salynǵan múlikterdiń taǵdyryn sot­tar ýaqtyly sheship, sot oryndaýshy­lary ony tez arada júzege asyrýy tıis. Osy tusta bir aıryqsha toqtalar jáıt bar, ol – Elbasymyz Nursultan Nazarbaev júrgizip otyrǵan dara saıasat. О́zińiz oılańyz, kezinde aldanyp qalǵan úlesker­ler jyldap jınaǵan qarjylaryn úı tur­ǵyzýshylardyń qolyna óz erikterimen ustatqany belgili. Olardy bireý kúshtegen joq. Árkim qurylys salýshyny ózi tańda­dy, sosyn qalaýymen aqshasyn berdi. Bir­aq soǵan qaramastan Elbasymyz bul máse­leni tikeleı óz baqylaýyna alyp, jábir­lengen úleskerlerdi dalada qaldyrmas úshin memleketten qomaqty qarjy bólgi­zip, olardyń baspanaly bolýyn qamta­masyz etti. Mundaı ıgilikti is tek Qazaq­standa ǵana jasaldy. О́ıtkeni, damy­ǵan memleketterdiń ózinde ıpotekalyq nesıe taratý sońy dúnıejúzilik daǵdarysqa ákelip uryndyrǵany belgili. Qazir sol daǵdarys shyrmaýynan áli shyǵa almaǵan AQSh-tyń 8 shtatynda 5 mln. adam bas­pana­syz qalyp, bul máseleni áli kúnge memlekettiń ózi de sheshe almaı otyr. – Iá, bul máselede Elbasynyń eń­be­gi erekshe ekendigi belgili. Jalpy, bú­gin­de ustalyp jatqan jemqorlar sany­nyń kóptigi men iriligi qaýipti keseldiń tym tereńge ketkenin bildiredi. Son­dyqtan qarqyndy odan ári údete tús­kendi halyq ta qýattaıdy. Osy oraıda Qarjy polısııasynyń aldynda qan­daı josparlar tur? – Qarjy polısııasynyń qyzmetin naýqandyq nemese josparly jumysqa aınaldyrýǵa bolmaıdy. Biraq jedel qyz­met únemi júrgizilýge tıis. Aldymyzǵa osy aıda osynshama jumys atqarylýy kerek dep naqty jospar qoıatyndaı bizdiń mekeme zaýyt, fabrıka emes. Árıne, bu­ryn Keńes ókimeti kezinde ýchaskelik mılısıonerge, mysalǵa bir aıda bes, ıakı on maskúnemdi, ne jumys istemeı qańǵy­bastyqqa salynǵan adamdy ustap ákelesiń dep aldyna naqty jospar qoıylatyn. Ol sony oryndaýǵa tıis edi. Al jedel qyzmet degenimiz, bizge jedel aqparattar túsip turady. Onda, máselen, mınıstr me, ákim be nemese basqa bir sheneýnik pe para alyp jatyr degen aqparat bolady. Biraq, ol aqparat boıynsha da birden jetip ba­ryp ustap alý múmkin emes. Rasynda, áýe­li, joǵaryda aıtqanymyzdaı, ne istep jat­qany tekseriledi. Arada baqylaý ju­mystary júrgizilip, biraz ýaqyt ótedi. Bul jerde satýshy men ákimdi ustaýdyń aıyrmashylyǵy jer men kókteı deıtinimiz sondyqtan. – Tamyry tereńge tartylǵan jem­qor­lyq­ty joıý jyry qashan toqtar eken? – Qolyna úlkendi-kishili bılik tıgen basshysymaqtar áýeli qalaıda ózi basqa­ryp otyrǵan ujymnyń jarty asyn asap qalýǵa asyǵady. Soǵan baılanysty qos-qostan sheteldik qymbat kólik alyp, eki, úsh qabatty úı turǵyzyp, týma-týys­qandarynyń da jaǵdaıyn jasap, úlde men búldege orana bastaǵandaryn jurt kór­meıdi, bilmeıdi dep oılaı ma, solaı bolý­ǵa tıis degendeı dúnıeni jalpaǵynan basa bastaıdy. Biraq sol kórgen, bilgen adamdar­dan qońyraý tússe, álgi asyp-tasyp jatqan baılyqtyń qaıdan kelip jatqandyǵyn bir-aq sátte ashýǵa bolady. Alaıda bul jaǵdaıda qur «jalaqymen» baıyp jatqandar men adal kásipkerlikpen tap sondaı baılyq jasap eńbek etip jat­qandardy ajyrata bilý kerek. Sondyqtan da bul jemqorlyq degenimiz kez kelgen qoǵamǵa jan-jaqty asa qaýip tóndiretin áleýmettik qubylys bolyp tabylady. Onyń kórinisteri qalypty demokratııalyq dástúrleri men ekonomıkasy damyǵan memleketterde de bar. Qazaqstanda jemqorlyqqa qarsy kúres memlekettik saıasattyń mańyzdy baǵyty bolyp tabylady. Bizde jemqorlyqqa qar­sy kúres saıasatynyń baǵdarlamalyq negizi bar. Árıne, onyń basty negizi Elba­synyń tikeleı kúsh-jigeriniń arqasynda qalanǵany belgili. Ár bes jyl saıyn Prezıdent Jarlyǵymen jemqorlyqqa qar­sy kúrestiń memlekettik baǵdarla­masy qabyldanady. Búginde 2011 jylǵa eseptelgen jemqorlyqqa qarsy tórtinshi baǵdarlama júzege asyrylý ústinde. Bul qujat bizdiń eldiń qaýipti keselmen kúrestegi negizgi baǵyttaryn qamtydy. Birinshiden, bul jemqorlyqqa qarsy zań­dardy jetildirý, ekinshiden, jemqorlyqty tómendetetin memlekettik sharalardy qabyldaý, úshinshiden, sot júıesi men quqyq qorǵaý organdaryn jetildirý, tór­tinshiden, jemqorlyqpen kúres salasynda halyqaralyq yntymaqtastyqty nyǵaıtý, besinshiden, buqaralyq aqparat qural­darynyń áleýetin paıdalana otyryp ha­lyq arasynda jemqorlyqqa qarsy keńi­nen nasıhat júrgizý jáne, altynshydan, azamattyq qoǵammen ózara baılanys bo­lyp tabylady. Jemqorlyqqa qarsy saıasattyń maq­saty men máni tereńde jatyr. Sonyń arqasynda qazir halyq jemqorlyq ózderi úshin, elimizdiń ulttyq qaýipsizdigi úshin asa qaýipti ekendigin kúnnen kúnge jete túsinip keledi. Tek bul emes, elimizdiń ekonomıkasynyń damýyna tusaý bolyp, halyqaralyq bedeline nuqsan keltiretinin de jaqsy túsinedi. Sondaı-aq 2007 jyly jemqorlyqpen kúresti kúsheıtý jónindegi qabyldanǵan zań isimizdi biraz ilgeriletti. Onda kezinde qylmystyq jolmen tapqan múlikterdi tárkileý basym baǵyt aldy. Tipti ol qylmyskerler keıin sottalyp ketse de basqa bireýdiń jeke menshiginde qaldyrǵan, ıaǵnı kezinde aram jolmen tapqan dúnıelerin tárkileý kózdeldi. Buryn jemqorlyq quqyq buzýshylyq jasaǵany úshin jumystan shyǵarylǵan adamdardy keıin qaıta memlekettik or­gan­darǵa nemese uıymdarǵa kez kelgen laýazymdy qyzmetke qabyldaýǵa Elba­synyń usynysy boıynsha tyıym salyn­dy. Osy atqarylyp jatqan isterdiń bári túbi sybaılas jemqorlyqtyń túgeldeı joıylyp ketýine bolmasa da, báseńdeýine áserin tıgizedi dep oılaımyn. – Azamattardyń Qarjy polısııa­synyń jalǵan qyzmetkerlerimen kezdeskenderi de boldy. Osyndaı jal­ǵandyqtan saqtaný úshin ne istegen durys? – Iá, ondaı oqıǵalardyń bolǵany ras. Sondyqtan aldaǵy ýaqytta azamattar kimmen sóılesip turǵanyn naqty bilýi úshin «144» senim telefonyna qońyraý shala qoısa belgili bolady. Ol adamnyń Qarjy polısııasynyń qyzmetkeri ekendigin anyq­taǵan soń, endi onyń áreketi durys pa nemese burys pa ekendigin taǵy surap bilýge múmkindik týady. Sonymen qatar, árbir azamat ár tekseris tek tıisti qu­jat­tar negizinde júrgiziletinin jáne ol qu­jattarmen tekseriletin adam aldyn ala ta­nystyrylýy qajettigin este ustaýy tıis. – El bedeli men halqymyzdyń múd­desi úshin joǵarydaǵy qyrýar ju­mys­tyń bárin uıymdastyryp, memleketke abyroı ákelgen agenttik qyz­metine qysqasha toqtalyp ótseńiz? – Agenttik qyzmet etip kele jatqan ýaqyt ishinde birqatar bedeldi eýropalyq jáne azııalyq eldermen tyǵyz qarym-qatynas ornatty. Bul yntymaqtastyqtyń quqyqtyq negizi halyqaralyq kelisim bolyp tabylady. Máselen, búgingi tańda agenttik BUU, EQYU, Ekonomıkalyq damý jáne yntymaqtastyq uıymy, Transperensı Interneshnl jáne Salyq jáne ınvestısııa boıynsha halyqaralyq orta­lyq­tarmen tyǵyz yntymaqtastyq ornatty. Ekonomıkalyq damý jáne yntymaqtastyq uıymynyń usynysy boıynsha Qazaqstan EDYU jemqorlyqpen kúres jónindegi Ystambuldyq áreket etý josparyna qa­byldandy. Sóıtip atalǵan uıymnyń kó­megi jáne yntymaqtastyq arqasynda Astana qalasynda Memleket basshysynyń qatysýymen «Jemqorlyqpen kúresti tıimdi basqarý – Shyǵys Eýropa jáne Or­talyq Azııanyń ekonomıkalyq jáne áleýmettik damýynyń jaǵdaıy» atty korrýpsııaǵa qarsy halyqaralyq konferensııa uıymdastyryldy. Atalǵan konferensııanyń elimiz úshin máni zor boldy. Onda «Jemqorlyqpen kúres jáne tıimdi basqarý týraly Astanalyq úndeý» halyqaralyq qujaty qabyldandy. Bul qujatta barlyq deńgeıdegi jemqorlyqty joıý, tıimdi toqtamdardy salý arqyly jemqorlyq áreketterin jazalaý, sheteldik laýazymdy tulǵalardy paraǵa tartýda qylmystyq qýdalaý barysynda halyq­aralyq yntymaqtastyqqa kómektesý sharttary qaralǵan. Sonymen qatar osy konferensııada jemqorlyqpen kúrestiń qazaqstandyq tájirıbesi alǵa tartyldy. – Sáttibek Ońǵarbaıuly, kóptegen oqyrmandarymyzdyń atynan salmaq­ty da salıqaly áńgimeńizge rahmet aıtamyz. Áńgimelesken Aleksandr TASBOLATOV.