Osy oraıda erekshe atap kórsetetin jaıt – elimiz táýelsizdigin alǵaly beri eshbir etnosaralyq nemese dinaralyq arazdyqqa jol berilgen joq. Qazaqstanda turyp jatqan barsha etnos ókilderiniń teńdeı múmkindikteri men quqyqtarynyń qamtamasyz etilýi olardyń óz bolashaǵyna degen senimderin nyǵaıtty. Buǵan, birinshi kezekte, memlekettiń ulttyq saıasatty durys baǵytta júrgizip kele jatqandyǵy oń yqpalyn tıgizip otyr.
Qazaqstannyń etnosaralyq saıasaty halyqaralyq qoǵamdastyq tarapynan joǵary baǵasyn alyp ta úlgerdi. Árıne, onyń astarynda zaıyrly memlekettiń básekege qabilettiligi men azamattaryn qazirgi zaman talabyna saı qalyptastyrýdaǵy róline, sondaı-aq, elimizde turatyn barsha halyqqa qatysty ishki saıasatynyń durystyǵyna degen durys kózqaras jatqany anyq. Jalpy, Qazaqstan aınalasyndaǵy memlekettermen de tatý kórshilik qarym-qatynas ornatqan. Sol sııaqty, Batys pen Shyǵys arasyndaǵy órkenıetter únqatysýyna ózindik úlesin qosyp keledi.
Sonymen qatar, elimiz álemde beıbitshilik pen túsinistik qalyptastyrý baǵytynda da ózindik utymdy usynystarymen jáne baǵaly bastamalarymen erekshelenedi. BUU-nyń eks-Bas hatshysy Pan Gı Mýn elimizge jasaǵan sapary barysynda Qazaqstan halqy Assambleıasy qyzmetiniń qaǵıdaty BUU jumysymen sáıkes keletinin Otanymyzdaǵy beıbit ómirdi kózimen kórip, kóńili tolǵan soń aıtsa kerek.
Jalpy, Qazaqstan TMD-ǵa múshe memleketter ishinde alǵash bolyp keremet ınstıtýt – Qazaqstan halqy Assambleıasyn qurdy. Munyń utqyr sheshim bolǵany anyq. Sonyń arqasynda etnosaralyq jáne dinaralyq kelisimdi nyǵaıtýǵa baǵyttalǵan polıetnostyq qoǵamnyń qazaqstandyq modeli qalyptasty. Al 2007 jyldyń mamyrynan bastap Parlament birqatar konstıtýtsııalyq ózgerister engizip, Májilis depýtattarynyń sanyn 107 adamǵa kóbeıtse, sonyń 9-y Qazaqstan halqy Assambleıasynan saılanatyn bolyp sheshildi.
Árıne, munyń ózi Assambleıa rólin barynsha arttyra tústi. Sondaı-aq, 2008 jyldyń 20 qazanynda qabyldanǵan «Qazaqstan halqy Assambleıasy týraly» Zań da etnosaralyq qatynastar salasyndaǵy azamattyq ınstıtýttar men memlekettiń tıimdi ózara yqpaldastyǵyn arttyryp, elimizdegi qoǵamdyq-saıası turaqtylyqty qamtamasyz etýge úles qosty jáne memlekettiń ulttyq saıasatyn júzege asyrý men Assambleıa jumysyn uıymdastyrýda úlken jetistikterge qol jetkizýge múmkindik berdi.
Assambleıa maqsatynyń ózi barshany qazaq halqynyń aınalasyna toptastyra otyryp, qazaqstandyq patrıotızmdi qalyptastyrý ǵoı. Bul jerde bastysy, halqymyzdyń azamattyq jáne rýhanı-mádenı ortaqtyǵy negizinde qazaqstandyq biregeılikti qalyptastyrý jolymen ultty básekege qabiletti etý desek, osy oraıda elimizde turyp jatqan júzden astam etnos ókilderiniń Qazaqstandy óz Otandary sanap, elimizde ultaralyq túsinistik saıasatyn ustanýlary asa mańyzdy.
Qoǵamymyzdyń qundylyqtary men qaǵıdattaryna negizdelgen El birligi doktrınasy 2010 jyly sáýirde, osydan týra jeti jyl buryn qabyldanǵan bolatyn. Bul – bolashaqqa birigip umtylýǵa serpin qosatyn mańyzy bar qujat desek, sol utymdy umtylys arqyly biz Máńgilik Eldiń irgetasyn qazirden qalap jatqanymyzdy aıqyn sezinýdemiz.
Qoryta aıtqanda, qazaqta «Yrys aldy − yntymaq» nemese «Birlik bar jerde tirlik bar» dep halyqty tatýlyq pen birlikke shaqyratyn maǵynalyq mańyzy joǵary sózder bar. Endeshe, sol birlik pen tirligimiz jarasym taýyp jatsa, eshkim de bizdi syrttan kelip búldire almaıdy. Iаǵnı, ishteı yntymaǵy jarasqan eldi eshbir syrtqy jaý jeńe almasa kerek. Sondyqtan bizdi eldik ıdeıasy biriktirip, ortaq qundylyqtar judyryqsha jumyldyra berýi tıis dep paıymdaımyz.
Samat MUSA,
«Egemen Qazaqstan»
