Táýelsizdik – babalardyń ańsap ótken muraty

Qalaı keldik bul jerge, Qalaı jettik bul kúnge, Qazaq eli jumaqqa meken deýge múmkin be?! Qazaq eli tozaqtyń shegi deýge bola ma, Sóıle, sóıle, endeshe, qyzyl tilim, irkilme!   Ata jaýdy qashyrǵan, Baba dańqyn asyrǵan, Qas dushpanym bas urǵan kúnder ótti basymnan, Qarsy aldymnan jel turyp, qaldym qazir entigip, Asamyn dep kelgende jıyrmasynshy  ǵa­syr­dan.   Ne jetedi jalǵanda dúnııa syryn bilgenge, Juldyzdarǵa kóz tiktim sútteı jaryq túnderde. Shymyldyǵym qurýly, týyrlyǵym túrýli, О́tken kúnnen belgi bop jetti bizdiń kúnderge.   О́tken kúnnen belgi kóp, ana tilim – qazynam, Seni jutsam baldaıyn, syrqatymnan jazy­lam. Jaqsy sózdi sondyqtan jatpaı-turmaı izdeımin, Bal arasy sekildi ómirimniń jazynan.   Syrt aınalyp bir kúnde dos-jarandar uǵys­qan, Kúnder jetti sýysqan, qaıyr ketti týystan, Umyt qalyp ósıet, jıyldy da qasiret, Sútpen sińgen qasıet shyǵyp ketti ýys­tan.   Áke tilin ul almaı, sheshe tilin qyz almaı, Balamyzben tildestik ózge tilde qyzar­maı, Endi otyrmyz ózimiz tastaı qylyp q­a­tyr­ǵan Kóbe-qardy sóge almaı, qalyń muzdy buza almaı.   Jolbarystaı qaıratty, arystandaı aıbatty Erlerimdi ezder kep abaqtyǵa aıdatty. Aryp-ashqan halyqqa nár beretin jan qalmaı, Pisken súttiń betinen qalqyp aldy qaımaqty.   Endi kórsem eń alyp báıterekter syr tunǵan, Butaqtary tonalyp, tamyrlary qyr­qyl­ǵan, Kúnim týdy desem de, jalbańdaǵan jymysqy oı «Aman júr dep bul nege?» – abalaıdy syrtymnan.   Jalǵan syryn bilse de, kókireginde myń arman, О́zin uqpaı júrse de, ózgelerdi uǵa alǵan, Kórgen ómir azabyn bala minez qazaǵym Jylandy da úıge engen aıran quıyp shy­ǵar­ǵan.   Sóıtip júrip qazaqtyń mańdaıynan kún týdy, Odaq degen olaqtyń tar astary jyrtyldy. Kórsete almaı qarsylyq jatqan shalǵyn jan­shy­lyp Boıyn tiktep, qaıtadan tirshilikke umtyldy.   Qaıta kóktep, kógerip, japyraq jaıyp tilimiz, Terezemiz teńelip, kókke jetti únimiz, Jalpaq jatqan jalǵandy kókteı ótken tirimiz, Kóp halyqtyń pirimiz, az halyqtyń birimiz.   Bılep-tóstep júrgenniń sypyryldy perdesi, Dóńgelengen jerde osy toqtamasyn el kóshi. Qaıta aınalyp qazyǵyn oralǵanda qazynam, Shashý bolyp shashyldy qazaǵymnyń teńgesi.   Táýelsizdik Almatynyń almasy emes top etken, Mata da emes artylǵan soń kesip bergen etekten. Tar jol, taıǵaq asýlarda júrgen izin muz etken, Jalǵyzaıaq talaı soqpaq jolaýshyny júdet­ken, Táýelsizdik babamyzdyń ańsap ótken muraty, Qatal qysta, sary aıazda tabanynan syz ótken. Táýelsizdik – tamasha sóz jaryp shyqqan jú­rek­ten.   Esim han men Qasym hannyń eski, qasqa jol­dary, Abylaı men Kene hannyń jer qaıysqan qoldary. Shákárimniń toryǵýy, Qurmanǵazy armany, Mahambettiń bulqynýy jaraly ańdaı tor­daǵy, Munyń bári úlken iske daıyndyqtaı aldaǵy, Táýelsizdik asýynyń batpan-batpan salmaǵy, Táýelsizdik – erkin eldiń tastaı berik qor­ǵany!   Taýdaı talap, qaırat qylǵan kisi bolsa tyr­banar, Táýelsizdik – qaınar kózi jańa ashylǵan jyl­ǵalar. Eldiń júzi táýelsizdik sáýlesimen nurlanar, Kózdiń jasy qarııanyń janarynan syrǵanar, Jeli údegen Jeltoqsanda aıbar bergen tul­ǵalar, Bir jutym sý, izdep kelgen kisi bolsa, bir qa­nar, Táýelsizdik! Bul máńgilik taqyryp qoı jyrlanar! Aqylbek ShAIаHMET.