Qarttarym aman-saý júrshi!..

«Qarııasy bar úı – quty bar úı» ekeni aqıqat. Abyz aqsa­qaly, shejire keýde anasy bar shańyraqqa bas suqsań ashýly kitap, shashýly qazynanyń ústi­nen túskendeı bolasyń. Sondaı qut qonǵan qara shańyraqtyń biri alty ul, alty qyzdy ómirge ákelip, 23 nemere, 14 shóbereni tárbıelep otyrǵan Qasymhan aqsaqal men Kúlshárı ájeniń úlgili otbasy. Kúlshárı áje. Seksenniń seńgirine qadam basqan qart ana ǵasyrǵa jýyq ómir jolyna kóz júgirtip, qaıta oralmas qyz sha­ǵyn, úlken ómirdiń tabaldy­ry­ǵyn jan jary Qasymhan ata­men qatar attaǵan sátin, el basyna bult úıirilgen zulmat soǵys jyldary, odan keıingi tyń ıgerý, tý­ǵan jerdiń to­pyraǵyna tamǵan árbir jas, árbir tam­shy terdi esine alǵanda ıegi dirildep, kóz­de­­ri­­ne jas úıi­re­di. Qazaq da­la­sy alma­ǵa­ıyp saıasat­tyń alańy bo­lyp turǵan sonaý 1936 jyly dúnıege kelip, úlken-kishi úıinde erkin kúle almaıtyn zamanda balalyq shaǵy bastan ótti. 1941-1945 jyl­dar­daǵy soǵys kezinde tylda ma­saq terdi, shóp jıyp shómele úıdi. Shúkir, qazekem: «Ornynda bar ońalar», degen ǵoı. Aýyrtpa­lyqty artqa tastap, el bolyp es jımaqqa bet túzegen 1947 jyly taǵdyr qosyp Mamytqanov Qa­sym­han ekeýi shańyraq kó­terdi. Úılendik eken, úı boldyq eken dep otyratyn zaman emes, sodan bastap zeınet jasyna jetip, qarııalyqqa aıaq basqansha sharýashylyq­tyń shashetek jumysymen bel sheshpeı eńbektendi. 12 bala­ny ómirge ákelip, Keńes Oda­ǵy kezinde, 1966 jyly «Ar­daq­ty ana» atandy. Uldy uıa­ǵa, qyzdy qııaǵa qondyramyn dep júrgende qoǵam ózgerip, elimiz óz aldyna táýelsiz mem­leket boldy. Elbasy N.Á. Na­zar­baev­tyń Jarlyǵymen qart ananyń omyraýyna «Altyn alqa» taǵyl­dy. Otaǵasy Qasymhan atamen shańyraq kótergenderine 60 jyl tolyp, nemere men shóbereniń ortasynda 80 jasyn toılap otyrǵan Kúlshárı áje ótkenge kóńil júgirtip, bolashaqqa kóz tigip otyrǵan qart tarıh ispetti. Qanat ESKENDIR, jýrnalıst.