Bozbala boksshylar básekesi

Búgin Qazaqstan Boks federasııasynyń uıymdastyrýymen elimizde tuńǵysh ret jasóspirimder arasynda álem chem­pıonaty bastalady. Oǵan álemniń 42 eliniń 385 bozbala boksshysy qatysyp, 30 shilde kúnge deıin 13 salmaq dárejesi boıynsha qolǵap túıistiredi. Bizdiń elimizde osy kezge deıin kóptegen boks týrnırleri men jarystary ótse de, sporttyń osy túrinen kadetter arasynda álem chem­pıo­na­ty áli ótkizilip kórgen emes. Elimizde osyndaı baıraqty básekeni ótkizý týraly sheshim byltyr Qytaıdyń Sıamın qalasynda ótken Halyqara­lyq áýesqoı boks qaýymdas­ty­ǵy atqarýshy ko­mı­tetiniń keńeıtilgen oty­ry­synda qabyl­dan­ǵany belgili. Sol kezde jas­óspirimder arasynda álemdik dodany ót­kizýge 5 el óziniń ótinishin ber­gen bolatyn. Alaıda daýys berýdiń nátıje­sinde Astana jáne Bangkok qalasynyń arasynda bolǵan soń­ǵy tartysta AIVA músheleri elimiz­diń as­tanasyn álem chempıonatyna laıyq dep sheshti. Jalpy, Halyqaralyq boks qaýymdas­ty­ǵynyń aıasyndaǵy kóptegen jarystardyń ishinde kadetter arasyndaǵy álem chempıonaty rettik sany boıynsha úshinshi chempıonat bolyp sanalady. Osyǵan deıin 15-16 jastaǵy boks­shy­lar arasyndaǵy álemdik báseke alǵash ret 2008 jyly 25 qazan men 1 qarasha araly­ǵyn­da Mek­sı­kanyń  Gvadalahara qalasynda ótke­nin bilemiz. Osy synda qazir eresekter qa­tarynda aıqasyp júrgen eki boksshymyz – Danııar Eleýsinov (60 kg.) pen Ivan Dychko (91 kg.) kúmis júlde alǵan bolatyn. Sol kezde komandalyq birinshi oryndy 4 altyn, 1 kúmis, 1 qola medalmen Kýba boksshylary jeńip aldy. Ekinshi oryndy alań ıeleri 2 altyn medalmen alsa, úshinshi oryndy 1 altyn, 3 kúmis, 5 qola júlde­men Reseı quramasy ıelendi. Odan keıin chempıonat byltyr 25 sáýir men 3 mamyr aralyǵynda Ázer­baıjannyń Baký qalasynda ótti. Bul báse­kede de bizdiń bozbala boksshylarymyz laıyqty óner kórsete almady. Osy aıqasta biz shırek fınaldan asa almaı, júldesiz elge qaıtqan edik. Al Baký básekesinde birinshi oryndy taǵy da Kýba quramasy jeńip alǵan bolatyn. Olar 3 altyn, 1 kúmis, 1 qola júlde komandalyq esepte birinshi orynǵa shyqty. Ekinshi oryn ádet­tegideı alań ıelerine buıyrdy. Ázerbaıjan komandasy bul synda 2 altyn, 1 qola medal ıelendi. Al úshinshi oryndy 1 altyn, 1 kúmis júldemen Úndistan quramasy jeńip aldy. Endi osy jolǵy álem chempıonatynda Qazaq­stan quramasy óz alańynda quralaqan qalyp qoımaıtynyna sengimiz keledi. Bizge bul synda birneshe medal alýǵa múmkindik berilip otyr. О́ıtkeni bıylǵy dodaǵa eki dúrkin álem chem­pıony atanǵan Kýba quramasy qatyspaıdy. Keshe Boks federasııasynyń ma­mandarynan osy máseleniń anyq-qanyǵyn su­rastyrǵanymyzda Bostandyq eli boks­shy­lary­nyń álem chempıo­na­tyna óz qaltasynan qarjy shyǵarmaı, uıymdas­tyrýshy jaq ja­rys­qa qatysý úshin jolaqysyn, jatyn ory­nyn tólese ǵana baramyz degen áńgime aıt­qanyn bildik. Qalaı bolsa da bizge keregi de osy boldy. Bul jerde biz boksshy­lary­myz­dyń kýbalyqtardan seskenedi, olarǵa ózderi jeńilip, altyndy sanap beredi degimiz kelmeıdi. Aıtaıyn degenimiz, Kýba kelmese, bizdiń bas júldege degen úmitimiz odan saıyn ar­ta­dy. Degenmen bizben birge keshegi Keńes Od­a­ǵy quramynda bolǵan Reseı, Ýkraına, О́zbek­stan men Ázerbaıjan komandalarynyń da júldege dámeli ekenin aıtý kerek. Sonymen birge, Úndi­stan, Mońǵolııa sııaqty ár jarys­tan júldesiz qaıtpaıtyn elderdi de umyt­pa­ǵanymyz jón. Máselen, Úndistannyń ózi soń­ǵy álem chem­pıo­natynda eshkimniń kómeginsiz, tóreshilerdiń qol­daýynsyz qola júldeni ıelengen komanda. Qazir bul eldiń boksshylary ár jarystan júldeli oryndy ıelenýge baryn salyp keledi. Desek te, shyn myqtyny sharshy alańnyń ózi kórsetedi. Taǵy aıtatyn bir nárse, álem chempıonatyna bizden basqa kóptegen elder eki qurammen kelip otyr. Eń kóp boksshysy bar el – Reseı men Ýkraına. Olardyń qatarynda 26 boksshy bar. Sonyń ishinde kóbisi kavkazdyqtar men túrki tildes halyqtardyń ókilderi. Reseıde boks, kúres, aýyr atletıka sııaqty sport túrlerinde kavkazdyq nemese túrki tektes halyqtardyń ókilderi basym ekenin bilemiz. Osylaı kete berse, bolashaqta soltústiktegi kórshimizdiń atynan musylman halyqtary jarysta el namysyn qorǵaıtynyna senim mol. Bıylǵy chempıonatta О́zbekstan da biraz boksshysyn ákelip otyr. Olar­dyń quramynda 19 bala bar. Bizdiń qurama­da 13 boksshy qolǵap túıistiredi. Olardyń bári óz salmaq dárejesinde aıqasatyn ózimizdiń qara kózder. Al eń az boksshysy bar el – Serbııa quramasy. Onyń sapynda sharshy alańǵa 70 kg. salmaqta Denıs Memetovıch shyǵady. Aýǵan­stan, Bangladesh, Bosnııa jáne Gersegovına, Grýzııa, Latvııa, Chernogorııa, Slovakııa elderi chempıonatqa eki boksshydan ákeldi. Bizdiń quramada myna boksshylar álem chem­pıonatyna qatysady. Oljas Qalaýbek (46 kg.), Zańǵar Temirhan (48 kg.), Álibek Basapa (50 kg.), Raýan Zatýla (52 kg.), Bekjan Qıbatqalıev (54 kg.), Erkebulan Ermekov (57 kg.), Aıan Qalybekov (60 kg.), Qaıyrgeldi Dáýitbek (63 kg.), Aqylbek Ádilǵalıev (66 kg.), Dáýlet Baıǵabatov (70 kg.), Asqar Dúısáli (75 kg.), Tilek Qozbaqov (80 kg.), Tólegen Dıdar (80 kılodan joǵary). Dastan KENJALIN.