О́ńirde oń ózgerister kóp

Buǵan deıin habarlaǵanymyzdaı, ótken dúısenbi, seısenbi kúnderi Parlament Májilisiniń Tóraǵasy Oral Muhamedjanov jumys babyndaǵy saparmen Aqmola oblysynda boldy. Májilis spıkeri Elbasy N.Á.Nazarbaevtyń halqymyzǵa arnaǵan Joldaýynan týyndaıtyn mindetterdiń oryndalý barysymen tanysý maqsatynda Shortandy, Bulandy jáne Zerendi aýdandaryn aralap, birqatar áleýmettik-ekonomıkalyq mańyzy bar nysandarda bolyp, eńbek ujymdarymen júzdesti. Májilis Tóraǵasynyń sapary barysynda Aqmola oblysynyń ákimi Sergeı Dıachenko birge boldy. Oral Baıǵonysuly aldymen Shortandydaǵy A.Baraev atyn­da­ǵy astyq sharýashylyǵy ǵylymı-óndiristik ortalyǵyna atbasyn tiredi. Soltústik óńirdiń basty ǵy­lymı ortalyǵy aýyl sharýa­shy­lyǵy óndirisin damytý bary­synda irgeli jetistikterge qol jetkizýde. Ortalyq dırektory Jeksenbaı Qasqarbaev eginshilik mádenıetin kóterýdegi ozyq teh­nologııany engizý qadamdary, ónim­diligi joǵary jańa tuqymdardy synaqtan ótkizip, qoldaný bary­sy, aýyl sharýashylyǵy maman­da­ry men sharýa qojalyqtary­nyń ókilderiniń biliktiligin art­tyrý jumystary týraly keńinen áńgimeledi. Májilis Tóraǵasy osyndaǵy murajaı jádigerleri­men tanysyp, Qurmetti qonaqtar kitabyna qoltańba qaldyrdy. «Baı-Azat» JShS – aýdandaǵy óndirisi órge domalap turǵan sha­rýashylyqtardyń biri. Munda 2010 jyly 259,1 mıllıon teń­ge­niń ónimi shyǵarylsa, bıylǵy alty aıda 143 mıllıon teńgeniń ónimi óndirilip, oblys pen Astana tuty­ný­shylaryna jóneltildi. Májilis Tóraǵasy seriktestiktegi 49 adam­nyń aılyq jalaqysy 45-50 myń teńgeni quraıtyny bola­shaq qa­dam­dardyń oń yrǵaǵyn qam­tama­syz etetindigimen baıla­nystyrdy. Oral Muhamedjanov Shor­tan­dy kentindegi Qazaqstan Prezı­dentiniń «100 mektep, 100 aýrýhana» baǵdarlamasymen salynǵan 1200 oryndyq mektep jumysyna aıryqsha yqylas qoıdy. Memleket qamqorlyǵyna jaýap retinde mektep túlekteri bıylǵy bir­yń­ǵaı ulttyq testileýdi 80 balldyq kórsetkishpen aıaqtaǵan. Qurmetti meıman balalarmen emen-jarqyn áńgimelesip, olarǵa óziniń kitap­taryn syılady. Tabıǵaty tamyljyǵan Bulan­dy aýdany bitik egin ósirip, mal sharýashylyǵyn jańa tehnologııa­men damytýda jemisti jolda keledi. Oral Baıǵonysuly bilikti ma­man Norık Vardanıan basqara­tyn «Fırma Nanar» JShS-inde bolyp, óndiristi ártaraptandyrý baǵytyna oń baǵasyn berdi.  Fırma osydan tórt jyl buryn kórshiles «Novobratskıı» asyl tuqymdy sharýashylyǵynan 86 aq bas tuqymdy iri qara satyp alǵan edi. Qazir onyń sany 250-ge jetip, analyq mal 185 basqa jetipti. Jemshóptiń 1,5 jyldyq qoryn daıyndaǵan sharýashylyq et ón­dirýde ozattar qatarynan kóriný­ge senimdi. Aýdan basshylyǵynyń kómegimen «Nanardyń» shabyn­dyǵy men jaıylymynyń kólemi 1700 gektarǵa arttyrylypty. Son­daı-aq, jyl saıyn óndiriske 23-25 mıllıon teńge ınvestısııa quıatyn seriktestik 14 000 gek­tarǵa bıdaı, 500 gektarǵa arpa, 400 gektarǵa qaraqumyq jáne 100 gektarǵa súrlemdik júgeri ósirip otyr. Aýyl irgesindegi №67 al­qap­tyń belýardan keletin egin masaqtaryn salmaqtap kórgen spı­ker dıqandar júziniń nurlana túsýine tilektestik bildirdi. Kezinde áıgili segiz qyrly sańlaq Balýan Sholaq dúbir­let­ken óńir áleýmettik damýda da alda keledi. Byltyrǵy jeltoqsan aıynda záýlim «Baldyrǵan» ba­la­baqshasy paıdalanýǵa berilse, búgin Parlament Májilisiniń Tór­aǵasy Oral Muhamedjanov pen oblys ákimi Sergeı Dıachenko prezıdenttik «Balapan» baǵdar­la­ma­symen salynǵan 140 oryn­dyq qos qabatty «Baldáýren» bala­baq­shasyn ashty. Saltanatta qut­tyqtaý sóz sóılegen Májilis spıkeri qazirgi kezde elimizdiń túk­pir-túkpirinde osyndaı balalar baqshasy, emdeý oryndary, máde­nı-turmystyq mekemeler kóptep ashylyp jatyr. Muny Elba­sy­nyń elge qamqorlyǵy retinde ba­ǵa­laımyz. Búgin mundaı nysan­dar úlken qajettilikke aınaldy. Bulandy aýdanynda mektep ja­sy­na deıingi mekemege suranys­tyń 90 paıyzy qamtamasyz etilgeni zor jetistik. El qýanyshy kóbeıgeni memleketimizdiń qýat­tan­ǵanynyń, mereıimizdiń óske­ni­niń aıǵaǵy, degen Oral Baıǵo­nys­uly barlyq qolaılylyqtar qarastyrylǵan balalar baq­sha­syn aralap, sábıler baıǵazysyna úlken teledıdar baılady. Jınalǵan qaýym aýdan ákimi Ermek Nuǵymanovqa, qurylys isin qysqa merzimde ári sapaly aıaq­taǵan «Aqmola Trans Servıs-3» JShS dırektory Marat Beısenovke, Bulandy aýdanynyń qur­met­ti azamaty Bıgeldi Ǵabdýl­lın­ge alǵys aıtyp, aldaǵy ju­mystaryna tabys tiledi. Maqta­sa, maqtaıtyndaı bar. «Baldáý­ren­niń» jatyn bólmeleri, dem­alys jáne oıyn bólmeleri, dári­gerlik bólmesi, ashana, mýzyka jáne sport zaldary kóz tartady. Balabaqsha búldirshinderge qazaq tilinde tálim-tárbıe beretin bo­lady. Qazir munda 47 adam ju­mys istese, onyń 19-y pedagog mamandar eken. Jınalǵan qaýym Zámzágúl Maqshanaıqyzy men Ba­qytgúl Qojabergenovanyń búl­dir­shin shákirtteriniń konsertine qoshemetpen qol soqty. Budan keıin mártebeli meıman Zerendi aýdanynda salynyp jat­qan dene shynyqtyrý-saýyqtyrý kesheniniń qurylysynda bolyp, osyndaǵy partııalyq baqylaý beketiniń qyzmetimen tanysty. Májilis Tóraǵasynyń ekinshi kúngi jumysy da qaýyrt ári keń aýqymdy boldy. Ol údemeli ındýs­trııalyq-ınnovasııalyq jobamen jumys isteıtin «Agrımer Astyq» JShS un tartý keshe­ni­niń, «Kókshetaý mıneraldy sýla­ry» JShS-niń jańa jelileriniń, «ENKI» JShS-niń keramıkalyq kirpish shyǵarý tehnologııasymen tanysty. Parlament Májilisiniń Tór­aǵa­sy, «Nur Otan» HDP depý­tat­tyq fraksııasynyń jetekshisi Oral Muhamedjanov partııanyń oblystyq fılıalynda turǵyn­dar­dy qabyldap, oblys aktıviniń jınalysynda sóz sóıledi. Baqbergen AMALBEK, Aqmola oblysy. Sýrette: «Fırma Nanar» JShS-niń egistik alqabynda.