Táýelsiz eldiń tuǵyry bıik, irgesi bekem bolýy jolynda eńbektenip kele jatqan sondaı erler bar. Olar elge eren eńbek sińirýmen jáne eldiń turaqtylyǵyn qamtamasyz etýmen qatar, memlekettik turaqtylyqty da nasıhattaıdy. Elbasy Nursultan Nazarbaev «Qasterli Otanymyzǵa qaltqysyz qyzmet etý jáne ony qorǵaý – árbir azamattyń qasıetti boryshy», degen bolatyn. Halyqtyń qaharman uldary da, qol bastaǵan perzentteri de Otan degen uly uǵymnyń alasarmaýyn, tynyshtyq pen tatýlyqtyń tuǵyrǵa kóterilýin kózdedi.
Alash ardaqtysy Álıhan Bókeıhanov «Ultqa qyzmet etý bilimnen emes, minezden» degende de osyndaı batyl minezdi meńzegen bolar. Búgingi tańda Qordaı aýdany, Otar qalasy, Gvardeısk qalashyǵy №40 áskerı bazasy 75263 áskerı bóliminiń komandıri qyzmetin atqaryp júrgen Nurlan Ábdiqadyrov ta aldyńǵy tolqynnyń erlik jolyn jalǵastyryp kele jatqan azamat. Eńbek jolyn 1999 jyly vzvod komandıri bolyp bastaǵan ol osy ýaqytqa deıin áskerı salanyń túrli satylarynan ótti. Túrli synaqtarǵa tótep bergen ol Otan qorǵaý jolyndaǵy oıynan aınyǵan emes. Qaıta kún saıyn shyńdalyp, tájirıbe jınap keledi. Qalyptastyrǵan tájirıbesin ult turaqtylyǵy jolynda jumsaýdy kózdeıdi.
Irak memleketine 2003 jyly elimizden ınjenerlik-saperlik jasaǵy jiberilgeni belgili. Sol kezde Irakqa jasaq komandıriniń orynbasary bolyp Nurlan Ábdiqadyrov ta attanady. Adam ómiri synǵa túsip, el taǵdyry talqyǵa salynǵan tusta alty aı boıy sol jerde berilgen mindetterdi múltiksiz oryndaıdy. Áskerı salanyń qyr-syryn meńgergen sol kezdegi kapıtan shenindegi azamat árbir synda óz isine adal berilgen maman ekenin dáleldeıdi. 2007-2008 jyldary Almaty qalasy 61993 áskerı bóliminde qyzmet atqaryp júrgende de qazaqstandyq bitimgershilik tobynyń quramyna kiredi. Bul kezde maıor shenin alǵan Nurlan Ábdiqadyrov memlekettiń mártebesi, ulttyń abyroıy jolynda eńbek etedi.
– 2008 jyly ınjenerlik-saperlik jasaǵynyń komandıri retinde Irak memleketine ekinshi ret jiberildim. Iraktyń Baǵdad, Ál-Kýd qalalarynda bolyp, bitimgershilik operasııasyna qatystyq. Árıne, kún saıyn emes, sát saıyn ómirimizge qaýip tóngen kezder boldy. Máselen, ol jerde jarylǵysh zattar kóp. Al ony tabý, taýyp kózin joıý bizdiń mindet bolyp sanalady. Sondyqtan da qatelesýge eshqandaı jol joq edi, – deıdi Nurlan Alpysuly.
Nurlan Ábdiqadyrov 1996-1999 jyldary Qazaqstan Respýblıkasy Qarýly Kúshteriniń Áskerı akademııasyn bitirgen. 2012 jyly Reseı Federasııasynyń Qarýly Kúshteriniń Qurlyq áskerleri Jalpyáskerı akademııasynyń áskerı-oqý ortalyǵyn aıaqtaǵan. «Jaýyngerlik erligi úshin», II dárejeli «Aıbyn» memlekettik nagradalarymen marapattalǵan azamat búginde tórt perzent tárbıelep otyr.
Nurlan Alpysuly áýeli ataq úshin emes, abyroı úshin qyzmet atqaryp júrgenin aıtty. Beıbitshilik úshin basyn báıgege tigýge daıyn ol táýelsiz elimizdiń tuǵyrlanýyna áskerı maman retinde úles qosyp keledi.
– Elbasymyzdyń qoldaýy bizdi árdaıym jigerlendirip, alǵa jeteleıdi. Elbasy Nursultan Nazarbaev ár sózinde áskerı salaǵa erekshe kóńil bólip keledi. Bul salada qyzmet etýdiń asqan abyroı ekenin, zor maqtanysh ekenin aıtady. Batyr babamyz Baýyrjan Momyshuly «Tártipke bas ıgen qul bolmaıdy, tártipsiz el bolmaıdy» degen sózdi beker aıtpaǵan. Tártip pen tárbıe – turaqtylyq pen tatýlyqtyń kepili, – deıdi ol óz sózinde. Talap pen tártipti tý etken azamattyń ózinen keıingi býynǵa bereri de mol. Qyryqqa tolmaı qamal alǵan onyń beıbit kúndegi batyrlardyń qatarynda bolatyndyǵy zańdylyq.
Nurlan Ábdiqadyrov bul kúnde podpolkovnık shenindegi áskerı qyzmetker. Talaı jylǵy taban aqy, mańdaı terdiń aqtalǵanyn kózben kórgen azamat. El men jerdiń kıesin uǵynyp, qasıetin jete túsingen adamnyń qashanda joly ashyq, juldyzy joǵary bolmaq.
Hamıt ESAMAN,
«Egemen Qazaqstan»
Jambyl oblysy
