Boks
«Astana Arlans» boks klýby Búkilálemdik boks serııasy (WSB) aıasyndaǵy shırek fınaldyq kezdesýlerin Qaraǵandy qalasyndaǵy Serik Sápıev atyndaǵy Boks ortalyǵynda ótkizetin boldy.
Áýelde bul jekpe-jekter ońtústik astanadaǵy «Almaty Arena» sport saraıynda ótedi dep josparlanǵan edi.
Eske salar bolsaq, «Arlandardyń» shırek fınaldaǵy qarsylasy Reseıdiń «Patrıot Boksıng Tım» boks klýby. Alǵashqy kezdesý búgin Reseıdiń Kemerovo qalasynda ótse, qarymta jekpe-jekter 20 mamyr kúni Qaraǵandyda uıymdastyrylady.
Tennıs
Qazaqstandyq tennısshi Zarına Dııas Áıelder tennısi qaýymdastyǵynyń (WTA) jańartylǵan reıtıngisinde 151-shi orynǵa kóterildi. Buǵan deıin tennısshi qyzymyz 187-orynda turǵan bolatyn.
Al Qazaqstannyń birinshi raketkasy Iýlııa Pýtınseva bir saty tómen syrǵyp, 32-shi orynǵa tústi.
Jalpy, áıelder arasyndaǵy tennısshilerdiń úzdik úshtigi ózgerissiz qaldy. Topty amerıkalyq tennısshi Serena Ýılıams bastap keledi. Ekinshi orynda nemis tennısshisi – Anjelık Kerber. Al úshtikti chehtiń tennısshi qyzy Karolına Plıshkova túıindep tur.
Erkin kúres
Orynborda qyzdar arasynda erkin kúresten ótken halyqaralyq týrnırge Reseı men Qazaqstannan 205-ge tarta balýan qatysty.
Jarystan elimizdiń namysyn qorǵaǵan Mańǵystaý oblysynyń balǵyn balýandary oljaly oraldy. Olar bir altyn, bir kúmis jáne eki qola medal alyp, jankúıerlerin qýanyshqa bóledi.
Altyn júldeni 38 kıloda óner kórsetken Maral Táńirbergenova jeńip alsa, Ásem Qaıbýllaeva (43 kg) kúmis medaldy qanaǵat tutty. Al Alena Eleseeva (32 kg) men Sabına Qaıbýllaeva (38 kg) qola júldege qol jetkizdi.
Ázirlegen
Qaırat JÚNISULY
