Forým aıasynda ótken tórtinshi seksııanyń jumysy «Kompanııa jumysyndaǵy GR-kommýnıkasııalar» máselesine arnaldy. Bul otyrysta PR-shy klýbynyń prezıdenti Aıda Dosaeva, Qazaqstandaǵy Eýropalyq qaıta qurý jáne damý bankiniń dırektory Agrıs Preımanıs, «Samuryq Qazyna» AQ Úkimetpen ózara árekettesý jónindegi basqarýshy dırektory Nurlan Ahmetov, Úkimetpen baılanys jónindegi táýelsiz keńesshi Marǵulan Ospanov syndy basqa da spıkerler minberden sóz sóıledi.
Qazaqstanda GR qyzmeti (memlekettik bılik organdarymen baılanys, naqtyraq aıtqanda, kompanııalardyń memlekettik bıliktiń sheshimderine yqpal etý maqsatyndaǵy is-áreketteri) bizdiń naryqqa jahandyq kompanııalardyń kelýimen paıda boldy. Degenmen, sońǵy 25 jyl ishinde GR kommýnıkasııalar tasada qalyp otyr, bul qyzmet týraly jazyp ne aıtyp jatqandardy kórmeısiń, deıdi spıkerler.
Úkimetpen baılanys ornatýda táýelsiz keńesshi Marǵulan Ospanov «GR-dy kóleńkeden shyǵarý kerek», deıdi. Onyń jasaǵan zertteýi boıynsha, qazaqstandyq GR-mamanynyń kelbeti tómendegideı anyqtalǵan.
Bul jasy 30-40 jyl shamasynda, negizinen ekonomıka jáne qarjy salasynda bilimi bar, munaı-gaz salasyn tańdaıtyn, memlekettik nemese memleket qatysýymen ıelengen kompanııalarda jumys isteıtin azamat.
Sonymen qatar, spıker bul mamandyq boıynsha joǵarǵy bilim beretin arnaıy oqý oryndardyń bizdiń elde joq ekenin atap ótti. Shetelderde dál osy mamandyqqa qatysty myqty bilimdi AQSh jáne Ulybrıtanııanyń ýnıversıtetteri beredi.
Aınash ESALI,
«Egemen Qazaqstan».
ALMATY
