Senat Jer zańnamasynyń ózgeristerin maquldady

Búgin QR Premer-Mınıstriniń orynbasary – Aýyl sharýashylyǵy mınıstri A.I.Myrzahmetov QR Parlament Senatynyń plenarlyq otyrysynda «Qazaqstan Respýblıkasy Jer kodeksiniń jekelegen normalarynyń qoldanysyn jáne «Qazaqstan Respýblıkasynyń Jer kodeksine ózgerister men tolyqtyrýlar engizý týraly» 2015 jylǵy 2 qarashadaǵy Qazaqstan Respýblıkasy Zańynyń qoldanysqa engizilýin toqtata turý týraly» Zań jobasyn tanystyrdy, dep habarlaıdy Aýyl sharýashylyq mınıstrligi. «Atalǵan Zań jobasyn Aýyl sharýashylyǵy mınıstrligi Elbasy N.Nazarbaevtyń 2016 jylǵy 18 tamyzdaǵy Jarlyǵyn oryndaý úshin ázirledi», – dedi Vıse-Premer. Zań jobasynyń negizgi maqsaty – aýyl sharýashylyǵy jerlerin sheteldikterge, azamattyǵy joq adamdar, sheteldik zańdy tulǵalar, sondaı-aq jarǵylyq kapıtalyndaǵy sheteldikterdiń, azamattyǵy joq adamdardyń, sheteldik zańdy tulǵalardyń úlesi 50 paıyzdan asatyn zańdy tulǵalarǵa jalǵa jáne qazaqstandyqtarǵa jeke menshikke berýge baılanysty Jer kodeksiniń jáne «Qazaqstan Respýblıkasynyń Jer kodeksine ózgerister men tolyqtyrýlar engizý týraly» 2015 jylǵy 2 qarashadaǵy Qazaqstan Respýblıkasy Zańynyń normalaryna jarııalanǵan moratorıı merzimin 2021 jylǵy 31 jeltoqsanǵa deıin uzartý bolyp tabylady. Qazirgi tańda aýyl sharýashylyǵy jerleriniń sapaly jaǵdaıy, olardyń paıdalanylýy, menshik ıeleleri men jer paıdalanýshylar týraly málimetter bazasyn qurýǵa baǵyttalǵan revızııa jáne topyraqtyq, geobotanıkalyq zertteý, onyń kadastrlyq qunyn anyqtaýdy qamtıtyn jumystar júrgizý josparlanyp otyr. «О́z kezeginde, bul málimetter aýyl sharýashylyǵy jerlerin tıimdi paıdalanýdy josparlaý men baqylaýǵa negiz bolyp tabylady. Bul jumystardy júrgizý qosymsha ýaqytty talap etedi», – dep atap ótti A.Myrzahmetov. Sondaı-aq, zań jobasy memleket menshigindegi aýyl sharýashylyǵy maqsatyndaǵy jerlerdi berýge baılanysty máselelerdi zańnamalyq turǵyda retteıdi. Aıtalyq, moratorıı normalary aýyl sharýashylyǵy maqsatyna berilgen jerlerdiń barlyǵyna qatysty. Iаǵnı, aýyl sharýashylyǵy maqsatyndaǵy jerler bolǵandyqtan, tek qana qazaqstandyqtarǵa jalǵa beriledi, jeke menshikke berilmeıdi. Baıandama sońynda A.Myrzahmetov Zań jobasyn iske asyrýdyń memlekettik bıýdjetten qarjy shyǵyndaryn qajet etpeıtinin jáne áleýmettik-ekonomıkalyq ortaǵa ońdy áser etinin atap ótti.