Qanat Islam: Kelesi kezdesýim AQSh-ta ótedi

Qazaqstandyq kásipqoı boksshy Qanat Islam jaraqaty jaıly, sondaı-aq aldaǵy josparlary týraly málimdedi, dep habarlady vesti.kz «Kásibı rıngke eki qarsylas ta tek jeńis úshin shyǵady. Sharshy alańǵa shyqqanda sen eshqashan da jalǵyz emessiń. Saǵan úmit artqan, tek jeńis tileıtin, boıyńa erekshe bir kúsh beretin úlken bir el turady. Rıngke men ylǵı da jeńiske jetip, kók týymyzdy kezekti ret jelbiretý úshin shyǵamyn. Bul úshin boıymdaǵynyń bárin salamyn. Sońǵy kezdesýde shamamen ekinshi-úshinshi raýndta qolymdy jaraqattap aldym. Qarsylasyńa soqqy jasaǵan kezde óz qolyńdy jaraqattap alatyn sátter boksta jıi bolyp turady. Osydan keıin taktıkamyzdy birden aýystyrdyq. Qarsylasymdy tıtyqtatyp, upaı boıynsha jeńýdi kózdedik. Bul maqsatymyzǵa jettik te. Qazir qolym jazyldy. Kelesi jekpe-jekke daıyndalý ústindemin», – dedi Qanat. Halyqtyń densaýlyǵyńyzǵa alańdaýshylyq bildirgeni qanshalyqty oń áserin tıgizdi degen suraqqa: «Shyny kerek, árbir boksshyǵa búkil eli bolyp, densaýlyǵyn oılasa, qosymsha kúsh beredi. Men tek ózimdi oılaý úshin ǵana boksta júrgen joqpyn. О́skeleń urpaqqa týra jol kórsetsem deımin. Eger biz olarǵa jol kórsetpesek, basqa kim kórsetedi? Sondyqtan da belgili bir mejege toqtamaýymyz kerek», – dedi ol. Sonymen qatar, Qanat rıngke qashan shyǵatynyn da aıtty. «Kelesi kezdesýim AQSh-ta ótedi. Aldaǵy 10-15 kúnde kimmen qarsylasatynym jáne qaı kúni ótetini belgili bolady», – dedi. Astana qalasyndaǵy EKSPO kórmesinde jekpe-jek ótkizý týrly: "Mádenıet jáne sport mınıstri Arystanbek Muhamedıuly shaqyryp, boks keshinde judyryqtasý týraly usynys jasady. Men kelistim. Bárimizge belgili, halyqaralyq kórmege kóptegen týrıster keledi. Olarǵa ózimizdiń jetistikterimizdi, kóz tartar ǵımarattarymyzdy ǵana emes sportymyzdy da pash etýimiz qajet. Qazir álemde qazaqstandyq boksshylarǵa úlken suranys bar. Al elimizde chempıon bolý úshin tynbaı jattyǵyp júrgen kóptegen órenderimizdi bilemin. Menińshe, sheteldikter EKSPO kezinde boks keshine qýana-qýana qatysady", dedi. Aıta keteıik, 32 jastaǵy sportshy osyǵan deıin 22 kezdesý ótkizip, barlyǵynda jeńiske jetti. Sońǵy tıtýldyq jekpe-jekte ganalyq Patrık Alloteıden upaı jaǵynan basym tústi ári qolyn jaraqattap aldy. Bul jetistigi ony WBA reıtınginde joǵary kóterilýine múmkindik berdi.