Qazaqstanda sheteldik ınvestısııanyń rekordtyq kólemi tirkeldi

IV «Almaty Invest-2016» halyqaralyq forýmyna qatysý úshin, Almatyǵa 63 memleketten bıznesmender men ekonomıkalyq sarapshylar jınaldy. Barlyǵy 500-den asa qatysýshy keldi. Olardyń arasynda bilikti saıasatkerler, jetistikke jetken otandyq ári sheteldik bıznesmender, halyqaralyq uıymdardyń basshylary bar, dep habarlaıdy palata.kz. Bul forým bılik, bıznes, qoǵam arasynda pikir almasýǵa múmkindik beretin ashyq alań. Bári bir aýyzdan eldegi turaqtylyq pen bızneske kórsetilip jatqan belsendi qoldaýlar Qazaqstanǵa álemniń ár tarapynan ınvestısııa quıýǵa jol ashady dedi. QR Ulttyq bank tóraǵasy Danııar Aqyshevtyń aıtýynsha, bıyl Qazaqstanǵa quıylǵan sheteldik ınvestısııanyń kólemi rekordtyq kórsetkishke jetken. «Sońǵy toǵyz aıdyń nátıjesi boıynsha sheteldik kompanııalar bizdiń eldiń ekonomıkasyna 12,1 mıllıard dollar qarjy quıdy. Munaıdyń baǵasy túskenimen, elde JIО́ kórsetkishi ósip keledi, qazirgi tańda ol 0,4 paıyzǵa teń», – dedi Danııar Aqyshev óziniń forýmda sóılegen sózinde. Almaty qalasynyń ákimi Baýyrjan Baıbek qalada ınvestorlarǵa qyzmet kórsetetin ortalyq jumys isteıtinin aıtyp ótti. Ol qazirgi kezde ınvestısııalyq ombýdsmen laýazymyn engizý qarastyrylyp jatqanyn habarlady. «Almatyda 183 myń shaǵyn jáne orta kásiporyn bar. Olardyń 14 myńy sheteldik ınvestısııanyń qatysýymen jumys istep jatyr. Almaty – jeke bıznes pen shıkizattyq emes ekonomıkalyq kapıtaldyń qalasy, ol el ekonomıkasynyń besten bir bóligin quraıdy», – dep atap ótti óz sózinde Baýyrjan Baıbek. Investısııa jáne damý mınıstrliginiń aqparatyn sensek, ken qazý sektoryna qatysy joq ınvestorlarǵa 283 qyzmet túri boıynsha, elge ákeletin qural-jabdyqtarǵa kedendik alym tóleýde birqatar jeńildikter jasaý jáne jerdi jeńildikpen berý qarastyrylǵan. Onyń ústine ınvestorlar ujymdyq tabys salyǵynan, menshik pen jer salyǵynan bosatylyp, jańa eksporttyq taýarǵa 30% ótemaqy ala alady. IV «Almaty Invest-2016» halyqaralyq forýmy aıasynda somasy 300 mlrd teńgeni quraıtyn 53 memorandýmǵa qol qoıyldy.