Búgin Almatyda «Almaty Invest 2016» IV Halyqaralyq ınvestısııalyq forýmy aıasynda «Almaty Startup City» forýmy ótti. Osylaısha ońtústik shahardyń bızneske beıim jastaryn jınaǵan aýqymdy jıynnyń mańyzdy da qyzyqty bóligi juma kúni Almaty Menedjment Ýnıversıtetinde jalǵasty.
Forým aıasynda qalada kásipkerlik orta qalyptastyryp otyrǵan bıznestiń tanymal ókilderi stýdenttermen suhbat alańyn qurdy. Jıynǵa «Almaty Invest 2016» forýmyna kelgen sheteldik qonaqtar da qatysty.
«Almaty qalasy Qazaqstan tabysynyń 20 paıyzyn beredi. Alaıda, bizde munaı óndirmeıdi, ónerkásip jáne joq. Qala – kásipkerlerdiń arqasynda damýda. Ońtústik astananyń aldaǵy damýy, Aqyldy qala (Smart City) jobasyn jasaý – Almatynyń jetken jetistikterimen shektelmeı, ishki ónimdi 30 paıyzǵa jetkizý kerek ekenin túsinýdiń ózi jaqsy. Biz bul maqsatqa jetýdi jeńildetetin – «Damý» qory men Almaty damý Ortalyǵynyń jaqsy jobalary men biregeı strategııasyn, Alataý ınnovasııalyq tehnologııalar parkin kórip otyrmyz. «Endi bizge ne jetpeıdi?», «Bulardy kim atqarady?» saýalyna jaýap jetispeı tur. Eń bastysy da – osy. Bul jerde bilimdi, kreatıvti, jańasha oılaı biletin, jigerli – kásipkerler qajet. Osy qasıetterdiń bári jastarǵa tán. Sonymen qatar, kásipkerlik, ınnovasııalyq ekoqurylym kerek. Kásipkerlik mádenıet, stýdent jastardyń sınergııasy men jaqsy sapaly bilim – mine, bizge eń basty bizge keregi osylar», – deıdi Almaty Menedjment Ýnıversıtetiniń prezıdenti Asylbek Kojahmetov.
Árıne, bıznes bastaýdy armandaý bir bólek te, ony shyn máninde júzege asyrý – keńes berý, baǵyttaý, qarjylyq qoldaý óte mańyzdy shart. Sondyqtan forýmdaǵy «Damý» Qory ókilderiniń qatysýy ózekti boldy.
Múddeli jıynda «Damý» Qorynyń Basqarýshy dırektory – Basqarma múshesi Ǵabıt Lesbekov elde jas kásipkerlerdiń 2 myńǵa tarta jobasy «Damý» Qorynyń baǵdarlamalary boıynsha qarjylandyrylyp, kásipkerlerge qyzmet kórsetý ortalyqtarynda 34 myńnan astam jas keńes alǵany týraly málimdedi.
«Damý» Qory «Almaty Startup City» forýmyna qatysqan stýdent jastarǵa «Jańa bıznes ashýdy qoldaý» jáne «Stýdent jastardyń kásipkerlik bastamalaryn qoldaý» jobalarynyń tıimdiligi týraly baıandady.
Sondaı-aq forým aıasynda ótken kórmege 24 ınnovasııalyq joba usynyldy. Bulardyń kópshiligi – «Aqyldy qala» jobasynyń sheshimderi. Máselen, Almatynyń ınteraktıvti kartasy, ǵalamtorlyq qalalyq symsyz jeliler, jasyl ekonomıkaǵa jumys isteıtin «aqyldy» aıaldamalar.
«Almaty Startup City» jıynynda qatarlas ótken sessııalarda «Kásipker álemdi qalaı jaýlaıdy?», «Shyǵarmashylyqtan bıznes jasaýǵa bola ma?», «100 ınjenerge jáne 100 uıaly ónimge barar jolda», «Stýdentke qalaı mıllıon tabýǵa bolady?» degen taqyryptarda bıznes-dárister júrdi.
Aınash ESALI, «Egemen Qazaqstan».
ALMATY
