Astanada demalys kúnderi aýa raıy kúrt sýytady

Aýa raıynyń buzylýyna baılanysty qalanyń kommýnaldyq qyzmetteri kúsheıtilgen rejimde jumys isteýde. «Astana Tazalyq» JShS málimetterine sáıkes, búgin qar tazalaý jumystaryna 350 arnaıy tehnıka tartyldy. Qala kóshelerine 357 jol jumyskeri shyqty, dep habarlady Astana qalasy ákimdiginiń baspasóz qyzmeti. Sınoptıkterdiń boljamyna sáıkes, jeldiń ekpini 15-20 m/s quraıdy, aýa temperatýrasy tómendeıdi dep kútilýde. «Atlantıkanyń ústinde túzilgen sıklondar úlken jyldamdyqpen qurlyqqa jaqyndap, Sibirge baǵyt alady. Al sıklonmen baılanysty atmosferalyq fronttar Qazaqstandaǵy aýa raıyna áser etýde. Osyǵan baılanysty demalys kúnderi qar jaýyp, burqasyndatady, batystan qatty jel soǵady», - dep habarlaıdy Qazgıdromet. Erteń kóshpeli bult shyǵady, oqtyn-oqtyn qar jaýady, boran soǵady. Ońtústik-batystan 9-14 m/s, keıde 15-20 m/s jyldamdyqpen jel soǵady. Termometr baǵany túnde -19…-21°S, keı jerlerde -28°S, kúndiz -8…-10°S bolady. 11 jeltoqsanda kóshpeli bult shyǵady, oqtyn-oqtyn qar jaýady, boran soǵady. Ońtústik-batystan 9-14 m/s jyldamdyqpen soqqan jeldiń ekpini keıde  15-20 m/s jetedi. Aýa temperatýrasy túnde -13…-15°S, kúndiz -3…-5°S. Boranǵa baılanysty respýblıkalyq mańyzdaǵy tas joldar jabyq.