Jastary myqty el erteńine alańdamaıdy

Almatydaǵy О́.Joldasbekov atyndaǵy Stýdentter saraıynda Qazaq ulttyq agrarlyq ýnıversıtetiniń uıymdastyrýymen el Táýelsizdiginiń 25 jyldyǵy, Almaty qalasynyń 1000 jyldyǵy men Tuńǵysh Prezıdent kúnine oraı «Táýelsiz eldiń jastary – Uly Dala eliniń tiregi» atty saltanatty kesh úlken tabyspen ótti. Bilim jáne ǵylym mınıstr­liginiń, Almaty qalasy men Almaty oblysy ákimdikteriniń ókilderi, kórnekti memleket jáne qoǵam qaıratkerleri, belgili qalamgerler, JOO jetekshileri jáne bilim men ǵylym, mádenıet salalarynyń úz­dik qyzmetkerleri men ardagerleri qatysqan merekelik is-sharada elimizdiń jáne atalǵan oqý ornynyń Táýelsizdik jyldaryndaǵy qol jetkizgen jetistikteri týraly teatr­landyrylǵan tarıhı kórinister, sondaı-aq, ýnıversıtet janyn­daǵy Stýdentter assambleıasy men Almaty qalasy ulttyq mádenı orta­lyǵymen uzaq jyldar bir­lese atqarǵan jumystarynyń nátı­jeleri kórinis tapty. Rýhanı taǵylymy mol mereke­lik baǵdarlama Ánuranmen bastalyp, ýnıversıtet janyndaǵy A.Jubanov atyndaǵy halyq aspaptar or­kes­tri­­niń oryndaýyndaǵy quı­qyl­­jyǵan kúıge ulasty. Odan ári 1-kýrs stýdentteriniń sahna­laýy­­men atalǵan oqý ornynyń tele­s­tý­dııasynda daıyndalǵan ege­­mendikke jetý jolynda halqy­myzdyń basy­nan ótken ár jyldardy baıan­daı­tyn kórkemsýretti jáne derek­ti fılmderden úzindiler teatr­lan­dyrylǵan kórinistermen órilip otyrdy. – Ǵasyrlar boıy ata-babamyz ańsaǵan Táýelsizdikke búgingi ur­paqtyń qoly jetti, – dedi 1-kýrs stýdentterine «Bilim kiltin» tap­syryp, sáttilik tilegen QazUAÝ rek­tory, UǴA vıse-prezıdenti, aka­demık Tilektes Espolov. – Táýel­sizdiktiń arqasynda irgemiz búti­ndelip, eńsemiz kóterildi. Qazaq­stan órkenıetti memleketter qataryna qosyldy. Uly Dala tósin­de yntymaq pen bereke ornady. Elimizdi álem moıyndady. Búgingi jetistikterimizdiń bári – elimizdiń Tuńǵysh Prezıdenti Nursultan Nazarbaevtyń júrgizip otyrǵan sarabdal saıasatynyń nátıjesi. En­digi maqsatymyz – qasıetti Táýel­­siz­diktiń tuǵyryn berik, ke­le­shegin kemel etý. Al elimizdiń ke­mel kele­shegi jastardyń qolynda. Zaman­ǵa saı damý úshin jańa tehno­lo­gııalardy ıgergen, jańasha oı­laı­tyn bilimdi jastar qajet. Son­dyq­tan, Memleket basshysy el jas­taryna álemdik deńgeıde bilim alýy­na barynsha jaǵdaı jasap kele­di. Ozyq bilim men ǵylymdy ıger­gen jastar – elimizdiń erteńgi tiregi. Merekelik keshtiń joǵary deńgeı­de ótýine qazaq estradasynyń tany­mal ánshileri Á.Kárimov, S.Ib­ragımov, A.Álekeshov, E.Qudaı­ber­genov atsalysyp, ánnen shashý shash­sa, ýnıversıtet janyndaǵy «Gúl­baný» án-bı ansambli, «Estra­da» úıi­r­mesiniń talantty jastary da áýe­lete án shyrqap, myń bura­la bıledi. Stýdentter arnaıy daıyn­daǵan zama­naýı fleshmob-bı for­matynda oqý ornynyń ánuranyn oryndady. Gúlzeınep SÁDIRQYZY, «Egemen Qazaqstan» ALMATY