Táýelsizdiktiń shırek ǵasyr toıy elden tysqary jerlerde de atalap ótýde. Ulybrıtanııadaǵy Ýorık ýnıversıtetinde oqıtyn qazaq stýdentter qoǵamdastyǵynyń uıymdastyrýymen ótken sharada sheteldikterge Qazaqstan týraly mol maǵlumat berilip, ulttyq mádenıetimiz ben as máziri tanystyryldy.
Bul kúni kisi qarasy kóp jınalatyn ýnıversıtettiń Piazza ortalyq alańyna kishigirim qazaq aýyly kóship kelgendeı boldy. Dúnıeniń túkpir-túkpirinen bilim qýyp kelgen sheteldikter qazaqtyń áýezdi áni men kúmbirlegen kúıin, ádemi bıin tamashalap, qurt, jent, baýyrsaq sııaqty ulttyq taǵamdardan aýyz tıdi.
Sonymen qatar, Ulybrıtanııadaǵy Qazaqstan elshiliginen ákelingen arnaıy kórnekilikter kópshilik nazaryn aýdardy. Aǵylshyn tiline aýdarylǵan Elbasynyń «Kóshbasshy joly» jınaǵy, EKSPO-2017, Qysqy Ýnıversıada qarsańynda daıyndalǵan promo materıaldar men kádesyılardy qýana qabyldaǵan sheteldik dostaryna qazaq jastary elimiz týraly áńgimelep berdi. Olardyń Qazaqstan týraly, ásirese, elimizdiń ashyq vıza saıasaty, ınvestısııalyq múmkindikter týraly bile túsýine BBC túsirgen qysqa fılm de áser etti deýge bolady.
Ýorık Qazaqstan stýdentteri qaýymdastyǵynyń jetekshisi Nurhan Tileýmuratovtyń aıtýynsha, shara Táýelsizdiktiń 25 jyldyǵyn toılaý konsepsııasyna saı «Nurly bolashaq» taqyrybyna oraılastyrylyp otyr. О́ıtkeni mundaǵy stýdentterdiń basym kópshiligi – «Bolashaq» shákirtaqysynyń ıegeri. Sondaı-aq óz qarajattaryn jumsap nemese Ulybrıtanııanyń Shevining shákirtaqysyna oqyp jatqan stýdentter de jetkilikti. Olar keleshekte básekege qabiletti maman bop oralyp, el damýyna barynsha úles qosýdy maqsat tutady.
