Munaı naryǵy jańa dáýirge qadam basty

Munaı óndirisin qysqartý týraly kelisimsharttyń sátti aıaqtalýy naryqta iri ózgeristerge jol ashyp, baǵany 2015 jyldyń ortasynan bergi maksımýmǵa kóterdi. OPEK pen oǵan kirmeıtin ózge munaı eksporttaýshy elderdiń 2017 jyldyń 1 qańtarynan bastap óndiristi 1,8 mln barrelge azaıtý týraly kelisimshart nátıjesinde búgin Astana ýaqytymen saǵat 17:00-de Brent markaly munaıdyń baǵasy 56,50 dollarǵa turaqtady. Al amerıkandyq WTI munaıy 53,80 dollarǵa saýdalanýda. Joǵaryda atalǵan kelisim keler jyldan bastap óz kúshine enetindikten, qazir eksporttaýshy memleketter óndiristi barynsha arttyrýǵa tyrysqan. Sonyń ishinde Saýdııa men Iraktaǵy óndiris kólemi aıtarlyqtaı ulǵaıdy. Onsyz da Saýd Arabııasy qarasha aıynda rekordtyq deńgeıde munaı óndirgen edi. Qazaqstan birer aı buryn ashylǵan Qashaǵan ken ornynyń arqasynda eksport kólemin eń joǵarǵy deńgeıge jetkizgen. Naryqtaǵy osyndaı jarystyń nátıjesinde ulttyq valıýtamyz AQSh dollary men eýroǵa shaqqandaǵy baǵamy bir jarym aı burynǵy mınımýmǵa deıin tústi. Jalpy, naryq zańdylyǵyna sáıkes, óndiris kólemi artqanda munaımen kún kórip otyrǵan elderdiń valıýtalary álsireýi tıis edi. Al bul jolǵy kerisinshe úrdistiń basty sebebi, bırjadaǵy saýdagerlerdiń keler jylǵa qaraı beıimdelýi. Sarapshylardyń aıtýynsha, munaı baǵasy jańa dáýirge qadam basyp, qubylý deńgeıi jańasha dálizge kóterildi. Shamamen aldaǵy ýaqytta qara altyn 50 dollardan tómenge túspeıtin sekildi. Al OPEK kelisiminiń júzege asatynyna kúmánmen qaraýshylar atalǵan qujattyń tek qaǵaz betinde qalyp, jeme-jemge kelgende eshbir el naryqtaǵy úlesinen aıyrylǵysy kelmeı, burynǵy kólemin saqtap qalýy múmkin ekenin aıtady. Onymen qosa, múmkindikti paıdalanyp, AQSh kompanııalary da slanstyq munaı óndirisine qarqyn bermek. Buǵan qosa naryqta jasandy túrde tapshylyq jasaý báribir uzaq merzimde jemisti bolmaıdy. Baǵanyń kóterilýi úshin suranys tabıǵı jolmen kóbeıý kerek, deıdi reseılik sarapshylar. Al qarasha aıynda munaı óndirisin tarıhta rekordtyq deńgeıge kótergen Qazaqstan keler jyldan bastap 20 myń barrelge azaıtýǵa mindetteldi. Al birer apta buryn Energetıka mınıstri Qanat Bozymbaev keler jyly Qashaǵandaǵy óndiristi 9 esege deıin kóterý týraly jospardyń baryn aıtqan edi. Keshegi kelisimshartty eskersek, bul kem degende aldaǵy jarty jylda júzege asa qoımaıtyn sekildi.