Avıasııa qyzmetin jetildiretin zań

Keshe Májilis Tóraǵasy Nurlan Nyǵmatýlınniń tóraǵalyǵymen palatanyń kezekti jalpy otyrysy bolyp, onda depýtattar tórt másele qarady. Sonyń ishinde keıbir zańnamalyq aktilerge áýe keńistigin paıdalaný jáne avıa­sııa qyzmeti máseleleri boıynsha ózgerister men tolyqtyrýlar engizý týraly zań jobasy birinshi oqylymda qaraldy. Baıandama jasaǵan Investısııalar jáne damý mınıstri Jeńis Qasymbektiń aıtýyna qaraǵanda, zań jobasy azamattyq avıasııa salasyndaǵy zańnamany Halyqaralyq azamattyq avıa­sııa uıymynyń (HAAU) standarttaryna sáıkestendirýdi kózdeıdi. Sonymen qatar, áýejaılardaǵy qyzmetterdiń sapasyn baqylaýdy kúsheıtýge zańnamalyq múmkindikter týdyrady. Avıasııa salasynyń medısınalyq sarapshylary men aeronavıgasııalyq qyzmet kórsetýshilerdiń jaýapkershiligin arttyrý da zań jobasynda qarastyrylǵan. Elimizdegi shaǵyn avıasııany damytý úshin zań jobasy jeńil jáne óte jeńil ushý apparattaryn paıdalanýshylardy aeronavıgasııalyq qyzmet kórsetýdiń alymdaryn tóleýden bosatýdy da qamtyǵan. Zań jobasy Salyq jáne Ákimshilik quqyq buzýshylyq týraly kodeks­terge jáne bes zańnamalyq aktige ózgerister men tolyqtyrýlar engizýdi usynǵan. Suraq berý rásimi bastalǵanda depýtat Sapar Ahmetov jeńil ushý apparattarynyń ushý qaýipsizdigine qandaı qyzmet jaýap beretinin surady. Oǵan mınıstr ushý apparattarynyń sertıfıkattaýdan ótip, tirkeletinin aıtty. Eger apparattan aqaý shyǵyp, apatqa ushyraıtyn jaǵdaı bola qalsa, sertıfıkattaýdan ótkizgen uıym jaýap beredi. Budan ári de birneshe depýtat mınıstrge ózderin tolǵandyratyn suraqtaryn qoıdy. Sonyń ishinde N.Nyǵmatýlın jekemenshik shaǵyn ushaqtardyń ushyp-qoný jumystaryn baqylaý kommersııalyq emes uıymdardyń quzyryna beriletindigi ózin alańdatatynyn bildirdi. Olar qaýipsizdik talaptaryn qanshalyqty talap ete alady, basqa ushaqtardyń ushyp-qonýyna kedergiler bolmaı ma? – dep surady Tóraǵa. Oǵan mundaı úlginiń halyqaralyq tájirıbede qoldanylatyndyǵy týraly jaýap berildi. Jalpy, jekemenshik jeńil ushý apparattarynyń qaýipsizdigi týraly másele kóptegen depýtattardy tolǵantatyny kórinip turdy. Mınıstr ekinshi oqylymǵa bul suraqtarǵa tolyqtaı jaýap beretin boldy. Osyndaı talqylaýlardan keıin zań jobasy birinshi oqylymda maquldanyp, ekinshi oqylymda qaralý úshin ázirlenýge jiberildi. Sonymen qatar, keshegi jalpy otyrysta keıbir zańnamalyq aktilerge básekelestik máseleleri boıynsha ózgerister men tolyqtyrýlar engizý týraly zań jobasy ekinshi oqylymda qaralyp, maquldandy. Basqa ózgeristermen qatar, ol Kásipkerlik kodeksine, tarıfterdi negizsiz kóterýdi boldyrmas úshin, qoǵamdyq mańyzy bar rynoktardy retteý jónindegi jańa taraý engizýdi qarastyrǵan. Al qoǵamdyq mańyzy bar rynoktar qataryna elektr qýatyn, gaz, temir jol men áýejaı qyzmetteri jáne t.b. paıdalanatyn tutynýshylar rynogy jatady. Sondaı-aq, Memleket basshysynyń «Nurly jer» turǵyn úı qurylysy baǵdarlamasyn ázirleý jónindegi tapsyrmasyn iske asyrý maqsatynda zań jobasy Kásipkerlik kodeksiniń 92 jáne 94-baptaryna, sonymen birge, «Jyljymaıtyn múlik ıpotekasy týraly» Zańǵa turǵyn úı qurylysyn memlekettik qoldaý tetikterin qamtamasyz etý boıynsha túzetýler engizgen. Kún tártibine sáıkes qaralǵan máselelerdiń arasynda Qazaqstan men Iran Islam Respýblıkasy arasynda sottalǵan adamdardy berý týraly kelisimdi ratıfıkasııalaý týraly zań jobasy da boldy. Bul zań jobasy týraly baıandama jasaǵan Bas prokýrordyń birinshi orynbasary Iogan Merkelge kóptegen suraqtar qoıyldy. Ratıfıkasııalaýǵa usynylǵan kelisim 2016 jyldyń 11 sáýirinde Tegeran qalasynda jasalǵan. Atynan kórinip turǵandaı, kelisim Iranda sottalǵan Qazaqstan azamattaryn, Qazaqstanda bas erkinen aıyrylǵan Iran azamattaryn jazalaryn óteý úshin óz elderine qaıtarýdy qarastyrǵan. Bir qyzyǵy, osyndaı kelisim áli kúnge Qazaqstan men О́zbekstan arasynda jasalmaǵan bolyp shyqty. Baıandamashy bul jumystyń endi ǵana qolǵa alynyp jatqanyn jetkizdi. Birshama talqydan ótken soń, kelisimdi ratıfıkasııalaý týraly zań jobasy maquldandy. Sonymen birge, osy kúni Májiliske kelip túsken Qazaqstan men Túrkııa arasyndaǵy arnaıy maqsattaǵy bólimshelerdiń oqý-jattyǵýlaryn ótkizý kezinde qabyldaýshy Taraptyń qoldaý kórsetýi týraly memorandýmdy ratıfıkasııalaý jónindegi zań jobasyna qorytyndy ázirleý merzimi belgilendi. Kún tártibindegi máseleler qaralyp bolǵan soń, birneshe depýtat ortalyq bılik organdaryna ózderiniń depýtattyq saýaldaryn joldady. Jaqsybaı SAMRAT, «Egemen Qazaqstan»