Ertis ústindegi kópir iske qosyldy

Keshe el Táýelsizdiginiń 25 jyl­dy­ǵy merekesine oraı elimizdegi iri jobalardyń biri – Ertis ózeni arqyly ótetin alyp kópir iske qosyldy. Kópir qurylysy Elbasy tapsyrmasy boıynsha bastalǵan bolatyn. Endi «Ortalyq-Shyǵys» kólik dálizi «Nurly jol» baǵdarlamasynyń bólshegine aınalyp otyr. «Qazavtojol» AQ ókilderiniń aıtýlarynsha, bul arkaly, ásem de erekshe alyp kópir zamanaýı jańa tehnologııa­lar boıynsha vant túrindegi kólbeý ıilgish ilmekterdi qoldaný arqyly salyndy. Kópirdi salýda elimizde tuńǵysh ret ortalyq arkany arnaıy gıdravlıkalyq júıe jáne «Heavy Lifting» domkrattarynyń kómegimen kóterý tehnologııasy qoldanyldy. Kópirdiń jalpy uzyndyǵy 12,3 shaqyrym. Estakada bóligi 66 tirekten turady, olarǵa temir-beton arqalyqtardan turatyn qurylǵylar ornatylǵan. Kólikter júretin bóligi tórt jolaqtan turady, ótkizý qabileti – táýligine 10 myń avtomobıl. Jańa kópir tranzıttik kóliktiń jol uzaqtyǵyn 40 km-ge qysqartyp, ýaqyt únemdeýge múmkindik beredi. Alyp qurylysqa 1800 adam, 700 tehnıka birligi, 6 sýda júzý quraldary jumys jasady. Sonymen qatar, oblystaǵy kólik qyzmeti, qoǵamdyq tamaqtaný jáne basqa qyzmet kórsetetin 100-ge jýyq shaǵyn jáne orta bıznes kásip­oryndary tartyldy. Nysannyń qury­lysyna jergilikti jáne qazaqstandyq qurylys materıaldary: qıyrshyq tas, sement, temir-beton buıymdary jáne basqa materıaldar paıdalanyldy. Kópirdegi qurylys jumystaryna jer­gilikti turǵyndar tartyldy. Jańa kópirdiń iske qosylýmen taǵy da bir erekshe jol aıyryǵy paıda bolyp, ol elimizdiń ortalyq bóligin Reseıdiń kórshiles óńirlerimen baılanystyrady. Kópirdiń ashylý saltanatyna Investısııalar jáne damý mı­nıstrligi Avtomobıl joldary ko­mıtetiniń tóraǵasy Mereke Pshen­baev, «Qaz­AvtoJol»UK» AQ bas­qarma tóraǵasy Ermek Qızatov, Ener­getıka mınıstri Qanat Bozymbaev, oblys ákimi Bolat Baqaýov, óńir jurt­shylyǵy qatysty. Merekelik saltanat kúni kópirdiń ústimen elimizde shyǵarylatyn elektromobılder men avtomobılder, kommersııalyq tehnıkalar sap túzep júrip ótti. Farıda BYQAI, «Egemen Qazaqstan» Pavlodar oblysy