Shyǵys Qazaqstannyń Úshbulaq aýylynda mektep ashyldy

El Táýelsizdiginiń 25 jyldyq mereıtoıy qarsańynda Kúrshim aýdanynyń Úshbulaq aýylynda jańa mektep ashyldy. Elimizdiń shalǵaı shekaralyq shebinde jatqan eldi mekendegi jańa nysannyń ashylý saltanatyna oblys ákiminiń birinshi orynbasary Nurymbet Saqtaǵanov qatysyp, turǵyndardy Táýelsizdik merekesimen quttyqtady. "25 juldyzdy kún" sharasy aıasynda ashylǵan 80 oryndyq jańa mekteptiń bıologııa, hımııa, fızıka pánderine arnalǵan synyptary men zerthanalary sońǵy úlgidegi tehnıkalyq quraldarmen jabdyqtalǵan jáne ınteraktıvti taqtamen, kompıýter synybymen qamtamasyz etilgen. Mektep qurylysyna 240 mıllıon teńgege jýyq qarajat jumsaldy. Kúrshim aýdanynyń ákimi Seısenǵazy Chýkaevtyń aıtýynsha, Táýelsizdiktiń shırek ǵasyry ishinde Kúrshim-Marqa óńirinde 16 jańa mektep boı kóterdi. «Elbasy Nursultan Nazarbaevtyń: «Biz bilim-ǵylym salasynda básekege qabiletti bolmasaq, óz maqsatymyzǵa jete almaımyz. Barlyǵy mektepten, al Qazaqstan úshin aýyl mektebinen bastalady» degen sózi bar. Iаǵnı, Memleket basshysy atap ótkendeı, bolashaǵymyzdyń jarqyn bolýy keleshek el tizginin ustaıtyn búgingi urpaqtyń enshisinde. Sondyqtan, elimizde jas býynnyń bilim alýyna barlyq jaǵdaı jasalyp otyr», – dedi aýdan basshysy. Úshbulaq aýylynyń baıyrǵy turǵyny, tyl ardageri Muhtarhan Aqpyshev keshegi zamannan búgingi kúnniń ozǵanyn, Táýelsizdiktiń el baǵyna berilgen erekshe qasterli qundylyq ekenin jetkizdi. Sonyń bir jarqyn kórinisi – úshbulaqtyq balalarǵa bilim beretin zamanaýı mekteptiń paıdalanýǵa berilgeni ekenin aıtyp ótti aýyl aqsaqaly. 1998 jyly qurylǵan Maraldy aýyldyq okrýginde Maraldy,Úshbulaq, Qystaý-Kúrshim atty úsh eldi-meken bar. 1 jarym myńnan astam adam turatyn okrýgte 9 seriktestik pen 45 sharýa qojalyǵy jumys isteıdi. Dýman ANASh, "Egemen Qazaqstan"