Reseı EKSPO-2017 kórmesindegi pavılonyn aldy

Búgin «Astana EKSPO-2017» ulttyq kompanııasynyń basqarma tóraǵasy Ahmetjan Esimov EKSPO-2017 kórmesindegi Reseıdiń ulttyq pavılonynyń komıssary, RF óndiris jáne saýda mınıstriniń orynbasary Georgıı Kalamanovpen kezdesti. Bul týraly primeminister.kz habarlady. Kezdesý barysynda eki jaq EKSPO-2017 kórmesin uıymdastyrý máselesin talqylady. A. Esimov Reseı tarapyn kórmege daıyndyq jumystarymen jáne halyqaralyq qatysýshylardy tartý maqsatynda júrgizilip jatqan jumystarmen tanystyrdy. О́z kezeginde, G. Kalamanov Astana qalasynda ótetin halyqaralyq kórmede jańartylatyn energııa kózderin paıdalaný boıynsha ózderiniń tehnologııalaryn kórsetý múmkindigi úshin rızashylyǵyn bildirdi. «Qazirgi tańda Reseıdiń EKSPO-2017 kórmesine qatysýy týraly barlyq máseleler sheshildi. Aıtalyq, qatysý tujyrymdamasy ázirlendi, bıýdjet qalyptastyryldy, pavılondy toltyratyn saraptama keńesi quryldy, EKSPO-ǵa qatysýǵa baılanysty birqatar uıymdastyrý jumystary atqaryldy. Reseılik kompanııalar bul úderiske qosylýǵa ázir. Kórme taqyryby biz úshin óte mańyzdy. Sondyqtan barynsha aıanyp qalmaýǵa tyrysamyz», - dedi Reseı ulttyq seksııasynyń komıssary. Ulttyq kompanııanyń habarlaýynsha, kezdesý sońynda RF pavılonyn tapsyrý boıynsha qujattarǵa qol qoıyldy. Pavılon aýmaǵy - 1 008,6 sharshy metrdi quraıdy. Reseı delegasııasynyń kelisimi boıynsha kelesi jyldyń qańtar-aqpan aılarynda pavılonnyń ekspozısııasyn bezendirý jumystary bastalady. Eske sala keteıik, búginde EKSPO-2017 halyqaralyq mamandandyrylǵan kórmesine 112 memleket pen 18 halyqaralyq uıym qatysatyndyǵyn rastady.