«Ybyraıdyń ósıeti» sahnalandy

Qostanaı memlekettik pedagogıkalyq ınstı­týtyndaǵy stýdentter teatry aqyn, dramatýrg Aqylbek Shaıahmettiń uly aǵartýshy Ybyraı Altynsarın týraly «Ybyraıdyń ósıeti» atty pesasyn sahnalady. Stýdentterdiń qaı-qaısysy da ózine júktelgen róldi sezimtaldyqpen oınap shyqty. Ybyraıǵa qazaq dalasynda mektep ashý ǵana emes, saýatsyz eline bilimniń mańyzyn túsindirý, ekinshi jaǵynan mıssıonerlerdiń aram pıǵylymen arpalysa júrip, ony óz halqynyń múddesine paıdalaný da ońaı tıgen joq. –  Sahnada Altynsarın tulǵasyn somdaý maǵan jeńil bolǵan joq. Sebebi Ybyraı Altynsarındi eń birinshi oınaýǵa nıettengende ıslam dinin naqty ustanǵan adam óziniń dinine berik ekendigin biletinmin. Qurannan kúsh-qýat alatyndyǵyn sezdim. Men de osy róldi somdaý barysynda ózimdi sol betke buryp, Quran qadirin jiti túsinýge tyrystym. Asa tereń qaıratkerdiń keıpin somdaý úshin onyń rýhanı deńgeıin túsiný kerektigin uqtym, – deıdi Ybyraı babamyzdyń rólin somdaǵan jaratylystaný-matematıka fakýltetiniń ká­siptik oqytý mamandyǵynyń 3-kýrs stýdenti Dýman Saıyn. Aqylbek Shaıahmet ustazdyń serigi aqyn Nurjan Naýshabaıulynyń Ybyraıǵa degen kirshiksiz adal dostyǵyn beınelegen. Onyń Ybyraıǵa mektep ashý barysynda qarjylyq jaǵynan da demeýshiler tabýǵa mol septigi tıgendigin ańǵarýǵa bolady. Osy baǵa jetpes syılastyqty sahnada kórermenge jetkize bilgen jas ártisterdiń jetekshisi Aqbıdash Ábdirkenovanyń eńbegi zor. Názıra JÁRIMBETOVA, «Egemen Qazaqstan» QOSTANAI