Beıjińde otandyq 20 kompanııanyń aýylsharýashylyq ónimderi tanystyryldy

Aýyl sharýashylyǵy jáne tamaq ónerkásibi salasyndaǵy qazaqstandyq 20 taýar óndirýshi kompanııa Qytaı astanasynda óz taýarlaryn tanystyrsa, 10 kompanııa ózderiniń ınvestısııalyq jobalaryn usyndy, dep habarlady Atameken palatasy. Olardyń arasynda Kásipkerlikti damytýdyń óńirlik kartasy aıasynda júzege asyrylyp kele jatqan agroónerkásiptik keshen, metallýrgııa, tamaq ónerkásibi, qaldyqtardy qaıta óńdeý salalaryndaǵy jobalar bar. Tanystyrylymǵa Aqtóbe, Almaty, Atyraý, Shyǵys Qazaqstan, Batys Qazaqstan, Qaraǵandy, Qostanaı, Pavlodar, Soltústik Qazaqstan jáne Ońtústik Qazaqstan oblystarynyń kompanııalary da qatysty. Qazaqstandyq qonaqtarǵa, óz kezeginde, 120-dan astam qytaılyq kompanııa óz ónimderin tanystyrdy. Olardyń qatarynda saýda, aýyl sharýashylyǵy ónimderin qaıta óńdeý jáne tamaq ónimderin shyǵarý, metallýrgııa jáne taǵy basqa salalar bar. Kompanııalar Beıjiń, Shandýn, Henan provınsııalary men Ishki Mońǵolııa, SÝAR jáne Shansı aımaqtaryna tıesili. Qazaqstandyq taýar óndirýshiler qytaılyq áriptesterine balyq, et, sút ónimderin usyndy. Sondaı-aq, qymyz, qurt, aıran jáne ashytqy, bal, un jáne makaron ónimderin, as ázirleý úshin paıdalanylatyn maı jáne basqa da ónimderdi nasıhattady. Aýyl sharýashylyǵy ónerkásibi jáne saýda palatasy, ónerkásip jáne saýdanyń jalpyqytaılyq federasııasynyń tóraǵasy Van Szıýnhaonyń aıtýynsha, «Qazaqstan men Qytaı aýyl sharýashylyǵy ónimderin shyǵarý jáne óńdeý salasy boıynsha tyǵyz yntymaqtastyq ornata alady. Qytaı turǵyndarynyń qazaqstandyq tamaq jáne aýyl sharýashylyǵy ónimderine degen suranysy joǵary, sol sebepti, Qytaı naryǵyn jaýlap alýǵa qazaqstandyq taýar óndirýshilerdiń múmkindigi jetedi». Tanystyrylymnan keıin, eki eldiń kompanııalary «V2V» sıpatynda kezdesýler ótkizdi.